آذربائیجان کی حکومت نے پاکستانی اور آزاد جموں و کشمیر کے طلبہ کے لیے حیدر علییف انٹرنیشنل اسکالرشپ 2025-26 کا اعلان کر دیا ہے۔
ہائیر ایجوکیشن کمیشن (ایچ ای سی) پاکستان کے مطابق یہ اسکالرشپ پروگرام بی ایس، ایم ایس اور پی ایچ ڈی کی سطح پر تعلیم حاصل کرنے کے خواہشمند طلبہ کے لیے ہے۔ اسکالرشپ کے تحت نہ صرف مکمل ٹیوشن فیس فراہم کی جائے گی بلکہ ہوائی سفر، ماہانہ وظیفہ، طبی انشورنس، ویزہ اور رجسٹریشن کے اخراجات بھی ادا کیے جائیں گے۔
ایچ ای سی کا کہنا ہے کہ یہ ایک نادر موقع ہے ان طلبہ کے لیے جو محدود وسائل کے باوجود اعلیٰ تعلیم حاصل کرنے کا خواب رکھتے ہیں۔ اس اسکالرشپ کے ذریعے طلبہ کو عالمی معیار کی تعلیم کے ساتھ ساتھ مختلف ممالک کے طالب علموں کے ساتھ بین الاقوامی ماحول میں سیکھنے اور خود کو منوانے کا موقع بھی ملے گا۔
درخواست دینے کی آخری تاریخ 15 مئی 2025 مقرر کی گئی ہے جبکہ شام 4 بجے تک اپلائی کیا جا سکتا ہے۔ خواہشمند امیدوار مزید تفصیلات اور درخواست فارم کے لیے ہائیر ایجوکیشن کمیشن پاکستان (ایچ ای سی) کی آفیشل ویب سائٹ پر رجوع کریں۔
