وفاقی وزیر پارلیمانی امور ڈاکٹر طارق فضل چوہدری کا کہنا ہے کہ ہمارا ملک عام نہیں بلکہ اپنی نوعیت کا واحد ملک ہے، منفرد مقام کی وجہ سے دوست بھی ہیں اور دشمن بھی ہیں۔
اسلام آباد میں تقریب سے خطاب کرتے ہوئے طارق فضل چوہدری نے کہا کہ پاکستان اپنے منفرد جغرافیائی اور تزویراتی مقام کی وجہ سے دنیا میں خاص اہمیت رکھتا ہے۔ اسی اہمیت کے باعث ہمیں جہاں دوستوں کی حمایت حاصل ہے، وہیں ملک دشمن عناصر کی سازشوں کا بھی سامنا ہے۔ ان ساشوں کو ناکام بنانے کیلئے قومی اتحاد ناگزیر ہے۔
طارق فضل چوہدری نے کہا کہ دہشتگردوں کا کسی بھی مذہب سے کوئی تعلق نہیں۔ انتہا پسندانہ سوچ کو جڑ سے ختم کرنے کی ضرورت ہے۔ ہم نےملک کو اکٹھا رکھتے ہوئے سازشوں کو ناکام بنانا ہے۔ دروازے پر گارڈز کھڑے کرنے سے مسئلہ حل نہیں ہوگا۔
انہوں نے کہا کہ پاکستان ترقی کے جس راستے پر گامزن ہے، اس سے تمام سازشوں کا ہمیشہ کے لیے خاتمہ ہو جائے گا۔ وفاقی وزیر نے کہا کہ وزیراعظم اور فیلڈ مارشل کی امن کی کوششوں کو عالمی سطح پر سراہا جا رہا ہے۔ حکومت کی اولین ترجیح اگلی نسل کو پہلے سے زیادہ محفوظ اور بہتر پاکستان فراہم کرنا ہے۔
