پاکستان اور متحدہ عرب امارات ( یو اے ای ) نے تاریخی ، ثقافتی اور اقتصادی روابط پر مبنی دو طرفہ برادرانہ تعلقات کو مزید مستحکم بنانے کا عزم کیا ہے۔
پیر کے روز وزیراعظم شہباز شریف سے نائب وزیر اعظم یو اے ای شیخ عبداللہ بن زاید النیہان نے ملاقات کی جس کے دوران شہباز شریف نے صدر یو اے ای شیخ محمد بن زاید النہیان کے لئے نیک خواہشات کا اظہار کیا۔
وزیراعظم نے مختلف شعبوں میں پاکستان کی مسلسل حمایت پر یو اے ای کردار کو سراہا اور دونوں ممالک کے درمیان تعاون کی مثبت رفتار پر اطمینان کا اظہار کیا۔
ملاقات کے دوران دونوں رہنماؤں نے تجارت، سرمایہ کاری، توانائی اور عوامی سطح پر روابط کیلئے تعاون بڑھانے پر زور دیا اور پاک، یواے ای تعلقات کو اقتصادی شراکت داری تک بڑھانے کی پاکستانی خواہش کا اعادہ کیا۔
ملاقات میں دوطرفہ تعلقات کے علاوہ علاقائی صورتحال اور عالمی پیشرفت پر بھی تبادلہ خیال کیا گیا۔
اس موقع پر شیخ عبداللہ بن زاید النیہان کی جانب سے متحدہ عرب امارات میں پاکستانی کمیونٹی کے تعاون کی تعریف کی گئی اور دوطرفہ تعلقات مزید گہرا کرنے اور تعاون کی نئی راہیں تلاش کے عزم کا اعادہ کیا گیا۔
وزیر خارجہ اسحاق ڈار سے ملاقات
اس سے قبل پاکستان اور متحدہ عرب امارات کے درمیاں مختلف شعبوں میں مفاہمت کی یادداشتوں پر دستخط ہوئے۔
متحدہ عرب امارات کے نائب وزیراعظم شیخ عبداللہ بن زایدالنہیان کے دورہ پاکستان کے دوران دوطرفہ تجارت اور سرمایہ کاری کے فروغ کے لئے مشترکہ بزنس کونسل کے قیام کی مفاہمتی یادداشت پر دستخط کئے گئےاور ثقافت کے شعبہ میں تعاون کا معاہدہ بھی طے پا گیا۔
نائب وزیراعظم اسحاق ڈار نے اپنے اماراتی ہم منصب کا گرمجوشی سے خیرمقدم کرتے ہوئے تعلقات کو نئی بلندیوں تک لے جانے کا عزم ظاہر کیا۔
اسحاق ڈار نے کہا کہ ہمارے درمیان دہائیوں پر محیط برادرانہ تعلقات ، مشترکہ عزم ، محبت اور اپنائیت ہے ، میری خواہش تھی کہ آپ کا دورہ کچھ طویل ہوتا لیکن مجھے علم ہے کہ آپ کی عالمی سطح پر بے شمار مصروفیات ہیں ، ہم آپ کا دل کی گہرائیوں سے خیرمقدم کرتے ہیں ۔
یو اے ای کے نائب وزیراعظم شیخ عبداللہ بن زاید النہیان نے پاکستان کے ساتھ تعلقات میں تیزی سے پیشرفت پر اطمینان کا اظہار کیا اور کہا ہمارے تعلقات اچھے انداز میں فروغ پا رہے ہیں ، جس مثبت جذبے کے تحت یہ تعلقات حالیہ مہینوں میں آگے بڑھے ہیں۔
