پی ایس ایل10 میں جمعہ کو کراچی کنگز اور کوئٹہ گلیڈی ایٹرز کی ٹیمیں مدمقابل تھیں، میزبان ٹیم نے پہلے بیٹنگ کرتے ہوئے 7 وکٹوں کے نقصان پر 175رنز اسکور کیے، جواب میں کوئٹہ گلیڈی ایٹرز 176رنز کے ہدف کا تعاقب کرتے ہوئے مقررہ 20 اوورز میں 9 وکٹوں کے نقصان پر 119 رنز ہی بناسکی اور یوں کراچی کنگز نے میچ 56 رنز سے جیت لیا۔
کراچی کنگز کی جانب سے فاسٹ بولر حسن علی نے شاندار بولنگ کرتے ہوئے 3 وکٹیں حاصل کیں۔
کوئٹہ کیخلاف میچ میں ہی حسن علی، وہاب ریاض کا اہم ریکارڈ توڑتے ہوئے پی ایس ایل کی تاریخ میں سب سے زیادہ وکٹیں لینے والے بولر بن گئے۔
حسن علی نے یہ کارنامہ کوئٹہ گلیڈی ایٹرز کیخلاف میچ میں حسن نواز کو صرف ایک رن پر آؤٹ کرکے سر انجام دیا، دائیں ہاتھ کے فاسٹ بولر حسن علی نے پی ایس ایل کی 84 اننگز میں سب سے زیادہ 116 وکٹیں حاصل کی ہیں۔
اس سے قبل پی ایس ایل میں سب سے زیادہ وکٹوں کا ریکارڈ وہاب ریاض کے پاس تھا جنہوں نے 87 اننگز میں 113 وکٹیں حاصل کی تھیں۔
تیس سالہ حسن علی پی ایس ایل 10 میں شاندار فارم میں ہیں اور اب تک وہ 3 میچز میں 8 وکٹیں حاصل کرچکے ہیں۔
واضح رہے کہ پی ایس ایل10 میں کراچی کنگز نے اب تک 3 میچز میں 2 میں کامیابی حاصل کی ہے اور ایک میچ میں اسے شکست ہوئی ہے۔
کراچی کنگز 4 پوائنٹس کے ساتھ پوائنٹس ٹیبل پر تیسرے نمبر پر ہے۔
