وزیراعظم شہباز شریف نے وزیراعلیٰ پنجاب کی جانب سے گندم کے کاشتکاروں کے لیے خصوصی پیکج کے اعلان کو قابلِ تحسین قرار دیا۔ کہا کہ پاکستان کی خوشحالی کسان کی خوشحالی سے وابستہ ہے۔
وزیراعظم نے پنجاب حکومت کی جانب سے گندم سپورٹ فنڈ کے تحت ساڑھے پانچ لاکھ کسانوں کے لیے پندرہ ارب روپے کے فنڈز کی منظوری کو خوش آئند قدم قرار دیا۔ شہباز شریف کا کہنا تھا کہ آبیانہ اور فکس ٹیکس میں چھوٹ کسانوں کو براہِ راست ریلیف دے گی۔
وزیراعظم نے کہا کہ گندم اور گندم سے تیار اشیاء کی برآمد کے سلسلے میں وفاقی حکومت پنجاب کو بھرپور تعاون فراہم کرے گی۔
وزیراعظم نے زور دیا کہ پاکستان مسلم لیگ ن کا منشور ہے کہ کسان کو اس کی محنت کا پورا معاوضہ دیا جائے۔چار ماہ مفت اسٹوریج کی سہولت سے گندم کو موسمی اثرات اور مارکیٹ کے دباؤ سے بچانا آسان ہوگا۔ وزیراعظم نے اس کسان دوست پالیسی پر وزیراعلیٰ پنجاب اور ان کی ٹیم کو خراجِ تحسین اور مبارکباد پیش کی۔
