جنوبی وزیرستان اپر کے عوام کے لیے ایک تاریخی فیصلہ۔ ضلعی ہیڈکوارٹرز کو ٹانک سے لدھا منتقل کر دیا گیا۔ مقامی افراد کو درپیش دیرینہ مشکلات کا خاتمہ ممکن ہو سکے گا۔
جنوبی وزیرستان (اپر) کے عوام کو بالآخر ایک بڑی سہولت مل گئی۔ ضلعی دفاتر کو ٹانک سے منتقل کرکے لدھا میں نیا ہیڈکوارٹر قائم کر دیا گیا۔اس سے قبل شہریوں کو کسی بھی سرکاری کام کے لیے طویل فاصلہ طے کرنا پڑتا تھا۔
ضلعی ہیڈکوارٹرز کی منتقلی کے بعد ایک اعلیٰ سطحی اجلاس بھی منعقد ہوا۔ اجلاس میں کور کمانڈر پشاور لیفٹیننٹ جنرل عمر احمد بخاری، چیف سیکریٹری شہاب علی شاہ، اور دیگر اعلیٰ سول و فوجی حکام نے شرکت کی۔
اجلاس کا مقصد نئے ضلعی ہیڈکوارٹر لدھا سے عوامی خدمات کی فراہمی کے انتظامات کا جائزہ لینا تھا۔ تمام محکمے اب لدھا سے ہی مؤثر انداز میں کام کریں گے اور عوام کو فوری سہولیات میسر آئیں گی۔
مقامی عمائدین اور عوامی حلقوں نے اس اقدام کو سراہتے ہوئے اسے وزیرستان کے لیے ترقی، استحکام اور روشن مستقبل کی امید قرار دیا۔ ضلعی دفاتر کی منتقلی پر عوام نے سیکیورٹی فورسز اور حکومت خیبرپختونخوا کا شکریہ ادا کیا۔
