امریکی ریاست الاسکا کی رہائشی میری پرل زیلمر رابنسن نے اپنی غیر معمولی صلاحیت کی بدولت دنیا کا سب سے بڑا منہ کھولنے کا گنیز عالمی ریکارڈ اپنے نام کرلیا۔
غیر ملکی میڈیا کے مطابق میری اپنے منہ کو 7.23 سے 7.33 سینٹی میٹر تک کھول سکتی ہیں جس کے ساتھ انہوں نے اس سے قبل رامسڈیل نامی شخص کا 6.52 سینٹی میٹر کا ریکارڈ توڑ دیا۔
میری پرل زیلمر رابنسن کی اس منفرد صلاحیت نے عالمی سطح پر توجہ حاصل کی ہے۔
ایک انٹرویو کے دوران انہوں نے بتایا کہ وہ سات بہن بھائیوں میں شامل ہیں اور بچپن میں اپنے بڑے منہ کی وجہ سے اپنے بہن بھائیوں کو حیران کیا کرتی تھیں، وہ اکثر مذاق میں اپنے منہ میں مالٹا یا لائٹ بلب ڈال کر سب کو تنگ کرتی تھیں۔
انہوں نے مزید کہا کہ وہ اپنی اس صلاحیت سے بخوبی واقف تھیں لیکن انہوں نے کبھی اسے سنجیدگی سے نہیں لیا تاہم، جب انہیں پتہ چلا کہ سب سے بڑا منہ کھولنے کا ایک عالمی ریکارڈ موجود ہے تو انہوں نے اسے توڑنے کا عزم کیا۔
اپنی محنت اور عزم کی بدولت میری نے نہ صرف یہ ریکارڈ اپنے نام کیا بلکہ اپنا نام گنیز ورلڈ ریکارڈز کی فہرست میں بھی شامل کرالیا۔
