بلوچستان زیر زمین قدرتی ذخائر کے خزانوں سے مالا مال صوبہ ہے، جہاں چین کے اشتراک سے سینڈک کے مقام پر گزشتہ 23 برس سے تانبے کی کان کنی جاری ہے۔
ضلع چاغی کے علاقے سینڈک میں چین کی کمپنی نے خام مواد کے اخراج سے لے کر 99.87 فیصد تانبے کے حصول تک کے انتظامات کر رکھے ہیں۔
ایس آئی ایف سی کے ترجیحی شعبوں میں شامل یہ منصوبہ پاکستان کی تاریخ میں اپنی نوعیت کا وہ پہلا منصوبہ ہے جہاں خام مال کو تیار مصنوعات میں تبدیل کیا جاتا ہے۔
چینی ماہرین کے مطابق سینڈک سے گزشتہ 23 برس میں 3 لاکھ 40 ہزار ٹن تانبا نکالا جاچکا ہے جبکہ اس مقام پر مزید 3 لاکھ ٹن تانبے کے ذخائر موجود ہیں، جو اگلے 15 برس میں نکالے جائیں گے ۔
چین کی معدنیات کی کان کن کمپنی نا صرف سینڈک سے دھات اخذ کر رہی ہے بلکہ گزشتہ دو دہائیوں سے علاقے کی بہتری کیلئے کام بھی کررہی ہے، کارپوریٹ سماجی ذمہ داریوں میں 25 بیڈ اور جدید آلات پر مبنی اسپتال کا قیام شامل ہے جس میں مقامی اور نواحی علاقوں کے مریضوں کا مفت علاج کیا جاتا ہے اور ادویات نصف قیمت پے دی جاتی ہیں۔
رپورٹ کے مطابق سینڈک میں کمپنی نے ایک ہائی اسکول بھی قائم کیا ہے جہاں طلباء کو مفت معیاری تعلیم فراہم کی جاتی ہے، جس میں کتابوں کی فراہمی اور نقل و حمل کی سہولیات بھی بلا معاوضہ فراہم کی جاتی ہیں، چینی کمپنی نے 6 نواحی گاؤں کو مفت بجلی اور پانی فراہم کر رکھا ہے۔
رپورٹ میں بتایا گیا ہے کہ کارپوریٹ سماجی ذمہ داری کے تحت کمپنی علاقے کے مکینوں کو پکے گھر بنا کر دے رہی ہے اور انہیں سالانہ راشن بھی مفت فراہم کیا جاتا ہے۔
ایس آئی ایف سی کی سہولت کاری کے باعث اس منصوبے کی کارکردگی مزید بہتر ہوئی ہے، اس کمپنی نے علاقے کی خوشحالی کی کاوشیں بھی بڑھا دی ہیں۔
