سماء ٹی وی پاکستان سپر لیگ ( پی ایس ایل ) کے سیزن 10 میں فرنچائز ملتان سلطانز کا میڈیا پارٹنر بن گیا۔
ایچ بی ایل پاکستان سپر لیگ میں اس دہائی کی سب سے کامیاب اور نمایاں فرنچائزز میں سے ایک ملتان سلطانز نے پاکستان کے معروف اور مقبول نیوز چینل سماء ٹی وی کے ساتھ اگلے 12 ماہ کے لئے بطور میڈیا پارٹنر ایک اسٹریٹجک شراکت کا اعلان کیا ہے اور اس شراکت کے تحت ملتان سلطانز کے کھلاڑیوں کے انٹرویوز، ٹیم کی تیاریوں کی تفصیلات اور میچز کے تجزیے خصوصی طور پر سماء ٹی وی کے ناظرین کے لئے پیش کیے جائیں گے۔
یہ تعاون سماء ٹی وی کی اسکرین اور ڈیجیٹل میڈیا پلیٹ فارمز کے ذریعے ملتان سلطانز کے مداحوں سے رابطے کو مزید مستحکم کرے گا۔
اس معاہدے کے تحت سماء ٹی وی نہ صرف پاکستان سپر لیگ (پی ایس ایل) میں ملتان سلطانز کی خصوصی کوریج کرے گا بلکہ ٹیم کی سیکنڈ الیون، جے ڈی ڈبلیو، کی پریذیڈنٹ ٹرافی گریڈ-II میں بھی بھرپور کوریج فراہم کرے گا اور اس اقدام کا مقصد نوجوان کھلاڑیوں کو مزید مواقع دینا اور ٹیم کو فرسٹ کلاس پریذیڈنٹ ٹرافی گریڈ-I کے لیے کوالیفائی کرنے میں مدد دینا ہے۔
مزید برآں سماء ٹی وی لودھراں میں ترین کرکٹ اکیڈمی کی سرگرمیوں کو بھی نمایاں طور پر دکھائے گا تاکہ نوجوان کرکٹرز کو ترقی کے مزید مواقع مل سکیں اور کرکٹ کے دائرہ کار کو وسیع کیا جا سکے۔
علی ترین کا خیر مقدم
اس معاہدے کا خیرمقدم کرتے ہوئے ملتان سلطانز کے مالک علی ترین نے کہا کہ ہمیں سماء ٹی وی کو پاکستان سپر لیگ اور اس سے آگے کے لئے اپنا میڈیا پارٹنر بناتے ہوئے خوشی ہو رہی ہے، سماء ٹی وی کی اسکرین اور ڈیجیٹل میڈیا رسائی اور ساکھ ہمارے اس وژن کے ساتھ مکمل طور پر ہم آہنگ ہے کہ ہم اپنے مداحوں کی تعداد بڑھائیں اور سال بھر اپنے مداحوں کو مشغول رکھیں۔
علی ترین کا کہنا تھا کہ کرکٹ کوریج کے لئے ان کا عزم اس بات کو یقینی بنائے گا کہ ملتان سلطانز کا سفر، میدان کے اندر اور باہر مداحوں تک دلچسپ اور خوبصورت انداز میں پہنچے۔
ان کا کہنا تھا کہ ہمیں یقین ہے کہ یہ شراکت باہمی طور پر فائدہ مند ہوگی اور سماء ٹی وی کے ذریعے ہم نہ صرف ایچ بی ایل پی ایس ایل کے دوران اپنے مداحوں سے رابطہ کریں گے بلکہ اپنی بنیادی سطح کی کوششوں کو بھی فروغ دیں گے۔
سماء ٹی وی کے صدر ندیم ملک کا خوشی کا اظہار
سماء ٹی وی کے صدر ندیم ملک نے بھی اس تعاون پر خوشی کا اظہار کرتے ہوئے کہا کہ ملتان سلطانز اس دہائی میں ایچ بی ایل پاکستان سپر لیگ کی سب سے مستقل مزاج اور کامیاب فرنچائزز میں سے ایک ہے جو مسلسل چار فائنلز تک پہنچی اور عمدگی کے لئے ان کا عزم سماء ٹی وی کے اسٹریٹجک وژن کے ساتھ ہم آہنگ ہے۔
ندیم ملک کا کہنا تھا کہ کرکٹ قومی جذبہ ہے اور ایچ بی ایل پی ایس ایل ملک کے سب سے منتظر کھیلوں کے ایونٹس میں سے ایک ہے، یہ شراکت ہمارے لئے کرکٹ کوریج کو بڑھانے اور اپنے ناظرین کو ملتان سلطانز کے سفر تک خصوصی رسائی فراہم کرنے کا ایک شاندار موقع ہے۔
یاد رہے کہ پی ایس ایل 10 11 اپریل سے 19 مئی تک جاری رہے گا اور محمد رضوان ملتان سلطانز کی قیادت کریں گے۔
