لاہور قلندرز نے ایچ بی ایل پی ایس ایل 10 کے لیے جنوبی افریقہ کے معروف کوچ رسل ڈومینگو کو اپنا نیا ہیڈ کوچ مقرر کر دیا۔
ترجمان لاہور قلندرز کے مطابق رسل ڈومینگو ڈیرن گف کی جگہ لیں گے جنہوں نے ناگزیر ذاتی وجوہات کی بنا پر معذرت کر لی تھی۔
رسل ڈومینگو اس سے قبل جنوبی افریقہ اور بنگلہ دیش کی قومی کرکٹ ٹیموں کے ہیڈ کوچ کے طور پر خدمات انجام دے چکے ہیں۔
اپنے تقرر پر ردعمل دیتے ہوئے انہوں نے کہا کہ وہ لاہور قلندرز کا حصہ بننے پر بے حد پرجوش ہیں اور جلد کام شروع کرنے، کھلاڑیوں اور مینجمنٹ سے ملنے کے منتظر ہیں۔
لاہور قلندرز کے سی او او ثمین رانا نے کہا کہ ہمیں خوشی ہے کہ رسل ڈومینگو ہیڈ کوچ کے طور پر قلندرز فیملی میں شامل ہو رہے ہیں۔
انہوں نے مزید کہا کہ ان کا بین الاقوامی سطح پر وسیع تجربہ اور کھلاڑیوں کو نکھارنے کی صلاحیت انہیں ٹیم کے لیے ایک قیمتی اثاثہ بناتی ہے اور رسل ڈومینگو کی قیادت ٹیم کی کامیابی میں اہم کردار ادا کرے گی۔
واضح رہے کہ لاہور قلندرز اپنا پہلا میچ 11 اپریل کو راولپنڈی میں اسلام آباد یونائیٹڈ کے خلاف کھیلے گی۔
