پاکستان سپر لیگ سیزن 10 کی تیاریاں عروج پر ہیں اور اب بات ٹورنامنٹ کے آفیشل اینتھم پر آن پہنچی ہے جس کیلئے پی سی بی نے پاکستان کے معروف گلوکار ’ علی ظفر‘ کی خدمات حاصل کر لی ہیں ۔
تفصیلات کے مطابق علی ظفر نے پاکستان سپرلیگ سیزن 10 کے آفیشل اینتھم کی دھن تیا ر کر لی ہے اور گانا جلد ہی ریلیز کیا جائے گا جو کرکٹ شائقین کو نہایت بے صبری سے انتظار ہے ۔
پہلا سیزن
پی ایس ایل کا پہلا سیزن 2016 میں کھیلا گیا جس کا اینتھم ’’ اب کھیل کے دکھا‘‘ علی ظفر نے گایا جو شائقین کرکٹ میں کافی پسند کیا گیا ۔
دوسرا سیزن
2017 میں پی ایس ایل کے دوسرے سیزن کیلئے علی ظفر نے ایسا گانا گایا جو کہ شائقین کرکٹ کے دل میں آج بھی بجتا ہے ، اس گانے کو نہ صرف پاکستان بلکہ سرحدوں پار بھی بے حد سراہا گیا ۔ اس نیشنل اینتھم کا نام ’ اب کھیل جمے گا‘ ، اس گانے کو گانے والے بھی علی ظفر ہی تھے ۔
تیسرا سیزن
2018 میں علی ظفر نے ایک مرتبہ پھر شائقین کرکٹ کے دلوں کو چھولینے والا ترانہ ’ دل سے جان لگا دے ‘ گایا ۔
چوتھا سیزن
2019 میں پی سی بی نے علی ظفر کی بجائے ابھرتے ہوئے نوجوان گلوکار ینگ دیسی اورگلوکار و اداکار فواد خان کی خدمات حاصل کیں جنہوں نے ’ کھیل دیوانوں کا ‘ کا گایا، یہ گانا بھی شائقین میں کافی مقبول ہوا۔
پانچواں سیزن
2020 میں گلوکاری کی شان کہلانے والے معروف گلوکاروں کو منتخب کیا گیا جن میں علی عظمت ، عارف لوہار جیسے لیجنڈز کے ساتھ نوجوان سنگرز ہارون، عاصم اظہر کا انتخاب کیا گیا ۔ ان تمام گلوکاروں نے مل کر ’ تیار ہیں‘ کمپوز کیا اور گایا۔
چھٹا سیزن
2021 میں پی سی بی نے پاکستان کی لیجنڈ گلوکارہ نصیبو لال کی خدمات حاصل کی گئیں جبکہ ان کا بھر ساتھ ینگ سٹنرز اور آئمہ بیگ نے نبھایا ،’’ گروو میرا‘‘ گانا عدنان دھول کی جانب سے لکھا گیا جبکہ اسے کمپوز زلفی نے کیا ۔
ساتواں سیزن
ساتویں سیزن میں کرکٹ بورڈ کی جانب سےبین الاقوامی شہرت یافتہ پاکستانی گلوکار عاطف اسلم کا انتخاب اور آئمہ بیگ کا انتخاب کیا گیا۔ دونوں نے مل کر اینتھم ’ آگے دیکھ ‘ گایا ۔
آٹھواں سیزن
پی ایس ایل کے آٹھویں سیزن میں’ سب ستارے ہمارے‘ کے نام سے اینتھم عاصم اظہر ، شائے گل اور فارس شفیع نے گایا ۔
نواں سیزن
گزشتہ اور نویں سیزن میں پاکستان کرکٹ بورڈ نے علی ظفر کی خدمات حاصل کیں جبکہ ان کا ساتھ بھر پور انداز میں آئمہ بیگ نے نبھایا ، اس گانے کا نام ’ کھل کر کھیل‘ تھا جو کہ شائقین میں بے حد مقبول ہوا ۔
