خیبر پختونخوا کے مشیر اطلاعات بیرسٹر محمد علی سیف نے کہا ہے کہ خیبر پختونخوا پولیس دہشت گردوں کا بہادری سے مقابلہ کر رہی ہے۔ تین دنوں میں پولیس نے دہشت گردوں کے متعدد حملے ناکام بنا دیے ہیں۔
مشیر اطلاعات نے بتایا کہ بنوں اور لکی مروت میں عوام نے پولیس کے شانہ بشانہ دہشت گرد حملوں کو پسپا کیا۔ خیبر پختونخوا حکومت بہادر پولیس اور غیور عوام کو خراجِ تحسین پیش کرتی ہے۔
انہوں نے کہا کہ عوام اور پولیس دہشت گردی کے خلاف جنگ میں متحد ہیں ۔انہوں نے کہا کہ عوام کے تعاون کے بغیر شرپسند عناصر کا خاتمہ ممکن نہیں۔
بیرسٹر محمد علی سیف نے کہا کہ وفاقی حکومت دہشت گردی کے خلاف جنگ میں تعاون کی بجائے سیاسی بیان بازی سے گریز کرے،دہشت گردی صوبائی نہیں بلکہ قومی مسئلہ ہے۔
انہوں نے کہا کہ وفاقی حکومت دہشت گردی کے خلاف خاموش تماشائی بنی ہوئی ہے۔بیرسٹر سیف نے کہا کہ وفاق نے دہشت گردی کے خلاف جنگ میں مدد کی بجائے صوبے کے فنڈز روک رکھے ہیں۔
