امریکا اور یورپی یونین نے بلوچستان میں جعفر ایکسپریس پر دہشت گرد حملے کی مذمت کرتے ہوئے پاکستان سے اظہار یکجہتی کیا ہے۔ امریکی سفارتخانے کا کہنا ہے کہ پاکستان کے مضبوط شراکت دار رہیں گے۔
بلوچستان میں منگل کو کالعدم بی ایل اے کے دہشت گردوں نے جعفر ایکسپریس پر حملہ کرکے درجنوں افراد کو یرغمال بنالیا گیا، پاک فوج نے تقریباً ڈیڑھ دن طویل کارروائی میں تمام 33 دہشت گردوں کو ہلاک کرکے 190 سے زائد یرغمالیوں کو رہا کرالیا۔ آئی ایس پی آر کا کہنا ہے کہ آپریشن میں 4 ایف سی اہلکار شہید ہوئے، جاں بحق شہریوں کی تفصیلات جمع کی جارہی ہیں۔
امریکی سفارتخانے نے جعفر ایکسپریس پر حملے کی شدید مذمت کرتے ہوئے کہا کہ اس حملے کی ذمہ داری کالعدم بی ایل اے نے قبول کی، امریکا کالعدم بی ایل اے کو عالمی دہشتگرد گروپ قرار دے چکا ہے۔
امریکی سفارتخانے نے واقعے کے متاثرین، انکے اہلخانہ سے خوفناک ہمدردی اور تعزیت کا اظہار کرتے ہوئے کہا ہے کہ امریکا پاکستان کا مضبوط شراکت دار رہے گا، ہم اس مشکل وقت میں پاکستان کے ساتھ کھڑے ہیں۔
یورپی یونین نے بھی جعفر ایکسپریس پر دہشت گرد حملے کی مذمت کی ہے، یورپی یونین کا کہنا ہے کہ حکومت اور پاکستانی عوام سے اظہار افسوس کرتے ہیں۔
