نیوزی لینڈ نے پاکستان کے خلاف شیڈول سیریز کےلیے ٹی 20 اسکواڈ کا اعلان کر دیا۔
پاکستان کے خلاف ٹی 20 سیریز کےلیے نیوزی لینڈ کرکٹ بورڈ نے کیوی ٹیم میں کئی تبدیلیاں کی گئی ہیں۔ پاکستان کے خلاف 5 ٹی ٹوئنٹی میچوں پر مشتمل ہوم سیریز میں ٹیم قیادت مائیکل بریسویل کو سونپی گئی ہے۔
اس سیریز کے لیے چیمپئنز ٹرافی اسکواڈ کے سات کھلاڑیوں کو کیوی ٹیم میں جگہ دی گئی ہے۔ تاہم نیوزی لینڈ کے کچھ اہم کھلاڑی اس سیریز میں حصہ نہیں لے سکیں گے۔
ٹیم میں ایش سودھی اور بین سیئرز کی واپسی ہوئی ہے، جبکہ کائل جیمیسن اور ول او رورکی ابتدائی تین میچز میں شرکت کریں گے جبکہ میٹ ہنری آخری دو میچز کے لیے دستیاب ہوں گے۔
آئی پی ایل کی مصروفیت کی وجہ سے معروف کھلاڑی لوکی فرگوسن، ڈیون کونوے، گلین فلپس، رچن روندرا اور مچل سینٹنر پاکستان کیخلاف ٹی 20 اسکواڈ کا حصہ نہیں ہوں گے۔
مائیکل بریسویل (کپتان)، فن ایلن، مارک چیپمین، جیکب ڈفی، زیک فوکس، مچ ہے، میٹ ہینری، کائل جیمیسن، ڈیرل مچل، جمی نیشم، ول او رورکی، ٹم رابن سن، بین سیئرز، ٹم سائفرٹ اور ایش سودھی۔
پاکستان ٹیم پانچ ٹی ٹوئنٹی میچز اور تین ون ڈے میچز کی سیریز کھیلنے کے لیے کل نیوزی لینڈ روانہ ہوگی۔ ٹی ٹوئنٹی سیریز کا آغاز 16 مارچ سے کرائسٹ چرچ میں کھیلے جانے والے میچ سے ہوگا۔
