وفاقی وزیر برائے سرمایہ کاری بورڈ، مواصلات اور نجکاری عبدالعلیم خان سے آسٹریلوی ہائی کمشنر نیل ہاکنز نے ملاقات کی ہے جس کے دوران دوطرفہ تعلقات، تجارتی تعاون اور سرمایہ کاری کے فروغ پر تبادلہ خیال کیا گیا۔
وفاقی وزیر عبدالعلیم خان اور آسٹریلوی ہائی کمشنر نیل ہاکنز کی ملاقات کے دوران پاکستان اور آسٹریلیا کے درمیان دوطرفہ تعاون کے فروغ پر بات چیت کی گئی۔
عبدالعلیم خان نے کہا کہ دونوں ممالک طلباء کے لیے وظائف، فوڈ اور واٹر سکیورٹی سمیت مختلف شعبوں میں تعاون کر رہے ہیں جبکہ پاکستان پولیو۔ ایڈز اور ملیریا کے خلاف جنگ میں آسٹریلیا کی مدد کو قدر کی نگاہ سے دیکھتا ہے۔
انہوں نے کہا کہ دونوں ممالک کے درمیان معاشی تعاون کو مزید فروغ دینے کی ضرورت ہے اور موسمیاتی تبدیلی اور معاشی ترقی کے لیے مل کر کام کرنے سے تعلقات مزید مستحکم ہوں گے۔
وفاقی وزیر نے بتایا کہ پاکستان آسٹریلیا کو چاول، لوہے کی مصنوعات، مصالحہ جات اور ٹیکسٹائل برآمد کر رہا ہے اور ان برآمدات کو مزید وسعت دینا چاہتا ہے جبکہ زرعی مصنوعات اور قدرتی دھاتوں کی برآمد کے بھی وسیع مواقع موجود ہیں۔
عبدالعلیم خان کا کہنا تھا کہ غیر ملکی سرمایہ کاروں کے لیے پاکستان میں سرمایہ کاری کا ماحول انتہائی سازگار ہے جس کی حوصلہ افزائی کے لیے متعلقہ اداروں میں اصلاحات کی گئی ہیں۔
اس موقع پر آسٹریلوی ہائی کمشنر نیل ہاکنز نے پاکستان کے ساتھ معاشی تعلقات اور سرمایہ کاری کے فروغ کے لیے موجودہ حکومت کے اقدامات کو حوصلہ افزا قرار دیا اور کہا کہ ہم باہمی شراکت داری کے تمام امکانات پر کام کرنے کے لیے پُرعزم ہیں۔
