وزیراعلیٰ خیبرپختونخوا علی امین گنڈاپور نے کہا ہے کہ مفت سولرائزیشن اسکیم میں کسی سفارش کو ترجیح نہیں دی گئی۔
وزیراعلیٰ خیبرپختونخوا علی امین گنڈاپور نے مفت سولرائزیشن اسکیم کی تقریب سے خطاب کرتے ہوئے کہا کہ صوبے میں بجلی کا مسئلہ سنگین ہے اور متبادل توانائی کے حل کے طور پر یہ منصوبہ شروع کیا گیا ہے۔
علی امین گنڈا پور کا کہنا تھا کہ حکومت ابتدائی طور پر معذور، بیواؤں اور خواجہ سراوں سمیت 32,500 مستحق گھرانوں کو مفت سولر پینل فراہم کر رہی ہے جبکہ دوسرے مرحلے میں عوام کو 50 فیصد سبسڈی پر سولر پینلز دیے جائیں گے۔
انہوں نے اس موقع پر واضح کیا کہ بیلیٹنگ کا عمل مکمل طور پر شفاف رکھا گیا ہے اور کسی سفارش کو ترجیح نہیں دی گئی۔
انہوں نے کہا کہ ڈی آئی خان کے لوگوں نے زیادہ درخواستیں جمع کرائیں، شاید اس خیال سے کہ وزیراعلیٰ کا تعلق وہاں سے ہے لیکن حکومت نے کسی کو خصوصی رعایت نہیں دی۔
ان کا کہنا تھا کہ سولر پینلز ان علاقوں کو دیے جا رہے ہیں جہاں لوڈشیڈنگ زیادہ ہے تاکہ عوام کو درپیش مشکلات کم کی جا سکیں۔
انہوں نے مزید کہا کہ خیبرپختونخوا حکومت کی کارکردگی دیگر صوبوں اور وفاق سے بہتر ہے اور ہم عوام کی خدمت کو ترجیح دے رہے ہیں۔
