الیکشن کمیشن نے پی بی 45 کوئٹہ میں دوبارہ پولنگ سے متعلق درخواست مسترد کردی۔ فریقین کو الیکشن ٹریبونل سے رجوع کرنے کی ہدایت کی گئی ہے۔
الیکشن کمیشن نے پی بی 45 سے متعلق محفوظ شدہ فیصلہ سنادیا۔ جے یو آئی کے امیدوار میر محمد عثمان پیرکانی کی درخواست مسترد کردی گئی۔ حلقے سے پیپلزپارٹی کے علی مدد جتک کامیاب قرار پائے تھے۔علی مددجتک کیخلاف نصراللہ بڑیچ کی درخواست بھی مسترد کردی گئی۔
الیکشن کمیشن نے دونوں درخواستگزاروں کو الیکشن ٹربیونل سے رجوع کی ہدایت کردی۔ الیکشن کمیشن نے اپنے مختصر فیصلے میں کہا کہ انتخابات کے نتائج مرتب کرنے میں بے ضابطگیوں کے حوالے سے متعلقہ فورم سے رجوع کیا جائے۔ انتخابی عذرداریوں سے متعلق الیکشن ٹریبیونلز موجود ہیں۔
الیکشن کمیشن نے فیصلے میں مزید کہا کہ نصراللہ بڑیچ نے 15 جنوری کو 15 پولنگ اسٹیشن پر ری پولنگ کو کالعدم قرار دینے کی درخواست دی تھی۔ عثمان پیرکانی نے پی بی 45 کے نتائج مرتب کرنے کے عمل کے خلاف الیکشن کمیشن میں درخواست دائر کی تھی۔
