وزیر اطلاعات پنجاب عظمیٰ بخاری نے عمران خان اور بشریٰ بی بی کو جیل میں کھانا نہ دینے کے بیان کو من گھڑت اور بے بنیاد قرار دیتے ہوئے کہا ہے کہ دونوں میاں بیوی کو معمول کے مطابق کھانے پینے کے لوازمات مہیا کیے جارہے ہیں۔
وزیر اطلاعات پنجاب عظمیٰ بخاری نے پی ٹی آئی رہنماؤں کے بیانات کے جواب دیتے ہوئے کہا کہ جو شخص دوپہر 12 بجے اٹھتا ہو، وہ روزہ کیسے رکھ سکتا ہے؟، بانی پی ٹی آئی کو ہفتے میں 3 دن گوشت، سبزیاں، دالیں، چقندر کا جوس مل رہا ہے، اس کے علاوہ کافی، بوائل انڈے اور خشک میوہ جات کھانے کو ملتے ہیں۔
ان کا کہنا ہے کہ بشریٰ بی بی کا کھانے کو جو دل چاہتا وہ مہیا کیا جاتا ہے، پشاور میں بیٹھے ایک شخص کو خواب آیا ہے کہ ان کے جیل میں بیٹھے آقا کو کھانا نہیں مل رہا، 2 روز قبل ان کی جماعت کے ترجمان نے بھی بانی پی ٹی آئی کی بیماری سے متعلق جھوٹ بولا۔
عظمیٰ بخاری نے مزید کہا کہ کل پمز کے 4 سینئر ڈاکٹروں کی ٹیم نے آدھا گھنٹہ ان کا تفصیلی طبی معائنہ کیا ہے، ڈاکٹروں نے بانی پی ٹی آئی کو مکمل صحتمند قرار دیا ہے۔
ن لیگی رہنماء کا کہنا ہے کہ جب اس جماعت کے پاس کوئی کارڈ نہیں بچتا تو اس کے رہنماء مظلومیت کارڈ اور ہمدردی کارڈ کھیلنا شروع کردیتے ہیں۔
