لاہورہائیکورٹ نے پی ٹی آئی کی 22 مارچ کو مینار پاکستان جلسہ کی اجازت کی درخواست پر ہائیکورٹ آفس کا اعتراض بحال رکھتے ہوئے درخواست خارج کردی۔ عدالت نے درخواست گزار کو متعلقہ کمیٹی سے رجوع کرنے کی ہدایت کردی۔
لاہور ہائیکورٹ کے جسٹس فاروق حیدر نے اعتراضی درخواست پر سماعت کی۔ درخواست گزار کی جانب سے مؤقف اپنایا گیا کہ پی ٹی آئی 22 مارچ کو آئین اور قانون کے مطابق مینار پاکستان پر جلسہ کرنا چاہتی ہے۔ انتظامیہ کو جلسے کی درخواست دی مگر کوئی جواب نہیں دیا گیا۔
عدالت نے درخواست گزار کو ریڈرسل کمیٹی سے رجوع کرنے کی ہدایت کردی۔ وکیل درخواست گزار نے کہا حکومتی متعلقہ کمیٹی کے پاس جانا بے سود ہے۔ جس پر عدالت نے قرار دیا کہ متعلقہ کمیٹی فیصلہ نہیں کرتے تو آپ عدالت سے رجوع کرسکتے ہیں۔
لاہور ہائیکورٹ نے پی ٹی آئی کی درخواست پر ہائیکورٹ آفس کا اعتراض بحال رکھتے ہوئے درخواست خارج کردی۔ ہائیکورٹ آفس نے درخواست متعلقہ کمیٹی کے سامنے دائر نہ کرنے کا اعتراض عائد کیا تھا۔
