انٹرنیشل کرکٹ کونسل (آئی سی سی) نے میچ فکسنگ کے الزام میں بنگلہ دیش کی ویمنز ٹیم کی اسپنر سہیلی اختر پر 5 سال کی پابندی عائد کر دی۔
بنگلہ دیشی کرکٹر سہیلی اختر پر ویمنز ٹی 20 ورلڈ کپ 2023ء کے دوران میچ فکسنگ کے الزامات کے تحت کرکٹ کے تمام فارمیٹس میں 5 سال کی پابندی عائد کی گئی ہے۔
بنگلہ دیش کی 36 سالہ کھلاڑی نے الزامات کو قبول کرتے ہوئے آئی سی سی اینٹی کرپشن کوڈ کی 5 شقوں کی خلاف ورزی کا اعتراف کرلیا، سہیلی پر پابندی کی مدت 10 فروری 2025ء سے شروع ہوچکی ہے۔
رپورٹس کے مطابق 2023ء میں ڈھاکا کے نیوز چینل نے ایک آڈیو جاری کی تھی، جس میں 2 کرکٹرز کے درمیان مبینہ گفتگو سنی گئی۔
رپورٹ میں بتایا گیا کہ جنوبی افریقا میں ہونیوالے ویمنز ٹی 20 ورلڈ کپ کے دوران لتا مونڈل نے سہیلی اختر سے رابطہ کیا تھا، تاہم، سہیلی نے ان الزامات کو مسترد کرتے ہوئے اسے غلط فہمی کا معاملہ قرار دیا تھا۔
واضح رہے کہ آف اسپنر سہیلی اختر بنگلہ دیشی ویمنز ٹیم کی جانب سے 2 ون ڈے اور 13 ٹی 20 انٹرنیشنل میچ کھیل چکی ہیں۔
