امریکی صدر ڈونلڈ ٹرمپ نے آج سے امریکا میں اسٹیل اور ایلومونیم درآمدات پر 25 فیصد ٹیرف عائد کرنے کا فیصلہ کیا ہے۔
میڈیا کے نمائندوں سے گفتگو کرتے ہوئے ان کا کہنا تھا کہ وہ ان ممالک سے درآمد کی جانے والی اشیا پر بھی ٹیرف عائد کریں گے جنہوں نے امریکی مصنوعات پر ٹیرف عائد کی ہوئی ہے۔
انہوں نے کہا کہ اگر وہ ہم سے 130 فیصد ٹیرف لے رہے ہیں اور ہم ان سے کچھ نہیں لے رہے تو اس صورتحال میں نہیں رہا جاسکتا۔
اس سے قبل انہوں نے چین پر 10 فیصد ٹیرف عائد کردی تھی تاہم کینیڈا اور میکسیکو پر 25 فیصد ٹیرف کا نفاذ آخری وقت میں 30 دنوں کے لیے موخر کردیا تھا۔
ڈونلڈ ٹرمپ نے گزشتہ مہینے صدارت کا عہدہ سنبھالنے کے بعد ٹیکس اور ٹیرف سے متعلق جارحانہ فیصلوں کا اعلان کیا ہے جن کی وجہ سے عالمی تجارت اور معیشت پر قابل ذکر اثرات پڑنے کی توقع کی جارہی ہے۔
دوسری جانب پاکستان میں بھی فیڈرل بورڈ آف ریونیو (ایف بی آر) نے خام لوہے اور اسٹیل کی درآمد پر عائد ریگولیٹری ڈیوٹی کی مدت میں 31 مارچ تک توسیع کر دی ہے۔
ایف بی آر کے مطابق خام لوہے پر 10 فیصد جبکہ اسٹیل مصنوعات پر 5 فیصد ریگولیٹری ڈیوٹی عائد کی گئی ہے۔
تاجروں کا کہنا ہے کہ اس ڈیوٹی کے باعث خام لوہے اور اسٹیل کی قیمتوں میں 11 ہزار روپے فی ٹن اضافہ ہو گیا ہے، جس کے بعد فی ٹن قیمت 2 لاکھ 62 ہزار روپے تک پہنچ گئی ہے۔
