آئی سی سی چیمپئنز ٹرافی 2025ء کی سیکیورٹی کیلئے کراچی، لاہور اور راولپنڈی میں پاک فوج تعینات کرنے کی منظوری دیدی گئی۔
وفاقی کابینہ نے آئی سی سی چیمپئنز ٹرافی 2025ء کی سیکیورٹی کیلئے آئین کے آرٹیکل 245 کے تحت فوج تعینات کرنے کی منظوری دیدی۔
ذرائع کے مطابق کرکٹ کے عالمی ایونٹ کے موقع پر پاک فوج، سول آرمڈ فورسز، پولیس اور قانون نافذ کرنے والے ادارے مشترکہ سیکیورٹی فراہم کریں گے۔
ذرائع کا کہنا ہے کہ چیمپئنز ٹرافی 2025ء کیلئے 12 فروری سے ٹیمیں پاکستان پہنچ رہی ہیں، پی سی بی، پنجاب اور سندھ حکومت کی درخواست پر سیکیورٹی کیلئے فوج کی تعیناتی کی منظوری دی گئی۔
ذرائع کے مطابق وزارت داخلہ نے ٹیموں کی فول پروف سیکیورٹی کیلئے اداروں اور صوبائی محکمہ داخلہ کو ہدایات جاری کردیں، چیمپئنز ٹرافی کیلئے آنے والی ٹیموں کو صدارتی سطح کی سیکیورٹی فراہم کی جائے گی۔
چیمپنئنز ٹرافی 2025ء کا پاکستان میں 19 فروری سے آغاز ہورہا ہے، ایونٹ 9 مارچ تک جاری رہے گا، میچز کراچی، لاہور اور راولپنڈی میں کھیلے جائیں گے۔
بھارت نے اپنی ٹیم پاکستان بھیجنے سے انکار کردیا، جس پر ان کے میچز ہائبرڈ ماڈل کے تحت یو اے ای میں منعقد ہوں گے، بھارتی ٹیم کے کوالیفائی کرنے پر ایک سیمی فائنل بھی دبئی میں ہوگا، اگر بھارتی ٹیم فائنل میں پہنچی تو ٹائٹل میچ بھی دبئی میں کھیلا جائے گا۔
دوسری جانب پاکستان، نیوزی لینڈ اور جنوبی افریقا کے درمیان سہ فریقی سیریز کا آغاز ہوگیا ہے، جس کیلئے پہلی بار سیکیورٹی خدشات کے پیش نظر اینٹی ڈرون ٹیکنالوجی آپریشنل کردی گئی ہے۔
واضح رہے کہ نو تعمیر شدہ قذافی اسٹیڈیم کا گزشتہ روز وزیراعظم شہباز شریف نے افتتاح کیا تھا، اس موقع پر رنگا رنگ تقریب کا انعقاد کیا گیا، جس میں معروف گلوکاروں نے اپنے فن کا مظاہرہ کیا۔
