پاسپورٹ دفاتر کے باہر ایجنٹ مافیا کیخلاف کارروائیوں کا آغاز ہوگیا۔ ڈی جی پاسپورٹس نے ملک بھر میں ایجنٹس پر کڑی نظر رکھنے اور ان کیخلاف سخت اقدامات کے احکامات جاری کردیئے۔
ملک بھر میں پاسپورٹ دفاتر کے باہر سرگرم ایجنٹ مافیا کیخلاف کریک ڈاؤن کا فیصلہ کرلیا گیا ہے۔ ڈی جی پاسپورٹس کے احکامات کے مطابق تمام ریجنل دفاتر یومیہ مانیٹرنگ رپورٹ ہیڈ کوارٹرز کو جمع کروائیں گے جبکہ خفیہ مانیٹرنگ کیلئے ہیڈ کوارٹرز کی ٹیم سرپرائز وزٹ بھی کرے گی۔
رپورٹ کے مطابق ایجنٹس کیخلاف روزانہ کی بنیاد پر مقدمات درج کئے جائیں گے اور گرفتاریاں عمل میں لائی جائیں گی۔
اطلاعات کے مطابق لاہور میں پاسپورٹ دفتر گارڈن لاہور کے باہر کارروائی کرتے ہوئے ایک ایجنٹ کو گرفتار کرکے مقدمہ درج کر لیا گیا۔ ڈی جی پاسپورٹس نے شہریوں سے اپیل کی ہے کہ وہ ایجنٹ مافیا کیخلاف کارروائیوں میں حکومت کا ساتھ دیں۔
ڈی جی پاسپورٹس مصطفیٰ جمال قاضی کے مطابق ملک بھر میں پاسپورٹ دفاتر کا دائرہ کار وسیع کیا جارہا ہے تاکہ شہری کسی بھی رکاوٹ کے بغیر آسان اور باوقار انداز میں پاسپورٹ حاصل کر سکیں۔
انہوں نے دعویٰ کیا کہ پاسپورٹ کی فراہمی میں تاخیر کی شکایات بھی دور کردی گئی ہیں اور شہریوں کو مقررہ وقت سے بھی کم عرصے میں پاسپورٹ جاری کئے جارہے ہیں۔
