امریکا میں برڈ فلو وائرس کے پھیلاؤ کے باعث چور ایک لاکھ انڈوں کو ایک ٹرک سے چرا کر لے گئے۔
غیرملکی خبر رساں ادارے کے مطابق امریکی علاقے وسطی پنسلوانیا میں ایک لاکھ انڈوں کی چوری کا واقعہ سامنے آیا ہے۔
امریکا میں آج کل برڈ فلو کے پھیلاؤ کے باعث انڈوں کی قیمت ریکارڈ سطح پر پہنچ چکی ہے۔
حکام کے مطابق یہ انڈے ایک کمپنی کے فارم کے تھے جن کو فرینکلین کاؤنٹی سے چرایا گیا، ان کی مالیت 40 ہزار ڈالرز کے قریب ہے۔
کمپنی کی جانب سے جاری کیے گئے بیان میں کہا گیا ہے کہ چوری کی رپورٹ درج کرادی گئی ہے اور مقامی حکام کی تحقیقات میں تعاون کررہے ہیں۔
بیان میں کہا گیا ہے کہ ہم اس معاملے کو بہت سنجیدگی سے لے رہے ہیں اور اسے جلد حل کرنا چاہتے ہیں۔
واضح رہے کہ امریکا میں انڈوں سے جڑی صنعت کو حالیہ مہینوں میں برڈ فلو کے پھیلاؤ کے باعث بحران کا سامنا ہے۔
برڈ فلو کے باعث لاکھوں مرغیاں ہلاک ہوگئیں جس کی وجہ سے انڈوں کی رسد میں کمی آئی اور قیمتوں میں اضافہ ہوا۔
