وزیراعظم شہباز شریف کا کہنا ہے کہ مقبوضہ کشمیر کا تنازع پاکستان کی خارجہ پالیسی کااہم ستون ہے اور رہے گا۔ یوم یکجہتی کشمیر پر کشمیریوں کی حمایت کااعادہ کرتے ہیں۔
مظفر آباد میں آل پارٹیز حریت کانفرنس کے رہنماؤں سے ملاقات میں وزیراعظم نے کہا کہ پاکستان اقوام متحدہ کی سلامتی کونسل کی متعلقہ قراردادوں کے مطابق حق خودارادیت کے حصول تک کشمیری عوام کے غیر متزلزل اخلاقی، سفارتی اور سیاسی حمایت جاری رکھے گا۔
وزیراعظم نے کہا کہ کشمیریوں کی اخلاقی، سفارتی اور سیاسی حمایت کرتے رہیں گے، حق خودارادیت کیلئے شہدا کی قربانیاں رائیگاں نہیں جائیں گی، بھارت مقبوضہ کشمیرمیں جارحیت، انسانی حقوق کی خلاف ورزیاں کررہا ہے، عالمی برادری کشمیرمیں بھارتی مظالم کے خلاف اقدامات اٹھائے۔
حریت رہنماؤں نے اقوام متحدہ کے پلیٹ فارم پر مسئلہ کشمیر بین الاقوامی برادری کے سامنے اجاگر کرنے پر وزیراعظم کو خراج تحسین پیش کیا۔ وزیراعظم کی وفاقی وزیر انجینیئر امیر مقام کو آزاد جموں و کشمیر میں مہاجرین کے مسائل اور خدشات حل کرنے کے لیے حکمت عملی تشکیل دینے کی ہدایت کردی۔
ملاقات میں وزیراعظم آزاد جموں و کشمیر چوہدری انوار الحق، وفاقی وزراء احسن اقبال، رانا تنویر حسین، انجینیئر امیر مقام، عطا اللہ تارڑ، کشمیری رہنما غلام نبی صفی، ایڈوکیٹ پرویز، اعجاز رحمانی، سید گلشن، محمد اشرف ڈار، شاہین اقبال، مشتاق احمد، خورشید احمد خان اور راجہ خادم حسین شاہین شریک تھے۔
