سینیٹ اراکین کی تنخواہوں میں اضافے کی منظوری کے معاملے پر سینیٹ کی فنانس کمیٹی کا اجلاس آئندہ ہفتے طلب کیئے جانے کا امکان ہے ۔
ذرائع کے مطابق جمعہ کو طلب کیا گیا سینیٹ فنانس کمیٹی کا اجلاس چیئرمین سینیٹ یوسف رضا گیلانی کے بیرون ملک دورہ کے باعث ملتوی کردیا گیا تھا ۔ سینیٹ سیکرٹریٹ کے ذرائع کا کہناہے کہ اجلاس میں ارکان سینیٹ کی تنخواہوں میں اضافےکی منظوری لی جائے گی ۔
ذرائع کا کہناہے کہ ارکان سینیٹ کی تنخواہ بھی ارکان قومی اسمبلی کے مساوی 5 لاکھ 19 ہزار کی جائے گی ، ارکان سینیٹ کی تنخواہوں میں اضافے کا اطلاق یکم جنوری سے ہی ہوگا۔
اس وقت ارکان سینیٹ کی تنخواہ بنیادی تنخواہ 1 لاکھ 50 ہزار روپے ہے ، چیئرمین اور ڈپٹی چیئرمین سینیٹ کی تنخواہ میں اضافہ نہیں ہوگا۔
سینیٹ فنانس کمیٹی میں چیئرمین یوسف رضا گیلانی ، ڈپٹی چیئرمین سینیٹر سیدال خان ، قائد ایوان اسحاق ڈار ، قائد حزب اختلاف شبلی فراز سینیٹر شاہزیب درانی ، سینیٹر عطاالرحمان ، سینیٹر فیصل سبزواری ، سینیٹر رانا محمودالحسن ، سینیٹر شہادت اعوان ،سینیٹر انوشہ رحمان ، سینیٹر لیاقت خان ، سینیٹر ثمینہ ممتاز زہری ،سینیٹر ہدایت خان اور سینیٹر سلیم مانڈوی والا شامل ہیں ۔
پارلیمنٹ کے منظور کردہ ایکٹ کے تحت ارکان سینیٹ کی تنخواہ بھی ارکان قومی اسمبلی کے مساوی ہوگی ،ارکان سینیٹ کی تنخواہوں میں اضافہ کا اطلاق یکم جنوری سے ہی ہوگا ۔
