سپریم کورٹ کے آئینی بینچ نے فوجی عدالتوں میں سویلنز کے ٹرائل کیخلاف انٹرا کورٹ اپیل پر سماعت کل تک ملتوی کردی۔ وزارت دفاع کے وکیل خواجہ حارث نے بند لفافوں میں 9 مئی کیسز کا ملٹری ٹرائل کا ریکارڈ پیش کردیا۔ جسٹس حسن اظہر رضوی نے ریمارکس دیئے کہ ریکارڈ کا سرسری جائزہ لیا، نو مئی واقعات بظاہر تو سیکیورٹی آف اسٹیٹ کا معاملہ نہیں لگتا، ملزمان کے کارنامے عوام میں بے نقاب ہونے چاہئیں تاکہ مذمت ہوسکے۔
سپریم کورٹ میں فوجی عدالتوں میں سویلینز کے ٹرائل کیخلاف انٹرا کورٹ اپیل پر سماعت جسٹس امین الدین خان کی سربراہی میں 7 رکنی آئینی بینچ نے کی جہاں وزارت دفاع کے وکیل خواجہ حارث کے دلائل دیے۔
سماعت کے آغاز میں جسٹس مسرت ہلالی نے کہا میرا کل بھی یہی سوال تھا کہ کیا چارج سے پہلے تفتیش ہوتی ہے؟ جسٹس علی مظہر نے کہا پہلے تفتیش ہوتی ہے اور پھر چارج ہوتا ہے، وکیل خواجہ حارث نے جواب دیا قانون میں واضح ہے کہ ٹرائل اور فیئر ٹرائل میں کیا فرق ہے۔
جسٹس حسن اظہر نے استفسار کیا کہ ملٹری ٹرائل میں ملزم وکیل نہ کرسکتا ہو تو کیا سرکاری خرچ پر وکیل ملتا ہے؟ خواجہ حارث نے جواب دیا وکیل کرنے کی حیثیت نہ رکھنے والے ملزم کو سرکاری خرچ پر وکیل دیا جاتا ہے۔
جسٹس مندوخیل نے کہا ملزم عدالت کا فیورٹ چائلڈ ہوتا ہے، کیا ملٹری کورٹ میں بھی ملزم کو فیورٹ چائلڈ سمجھا جاتا ہے؟ وکیل وزارت دفاع نے کہا آرمی ایکٹ کے رولز کے تحت ملزم کو مکمل تحفظ دیا جاتا ہے۔
جسٹم نعیم اختر نے کہا بطور چیف جسٹس بلوچستان ملٹری کورٹس کے فیصلے کے خلاف اپیلیں سنی ہیں، ایسا نہیں کہ ملٹری کورٹس فیصلےمیں سادےکاغذ پرلکھ دیا جائےکہ ملزم قصور وار ہے یا نہیں، جب ہائیکورٹس میں اپیل دائر ہوتی تو جی ایچ کیو پورا ریکارڈ دیتا ہے جس میں پوری عدالتی کارروائی ہوتی ہے، شواہد سمیت طریقہ کاردرج ہوتا ہے۔
جسٹس حسن اظہر نے سوال کیا کہ عام شہری کا ملٹری ٹرائل ہو توکیا میڈیا اور ملزم کےاہلخانہ کو رسائی ہوتی ہے؟ وکیل وزارت دفاع نے جواب دیا قانون میں اہلخانہ اورمیڈیا کو رسائی کا زکر ہےتاہم سکیورٹی وجوہات پر رسائی نہیں دی جاتی۔
دوران سماعت جسٹس نعیم اختر نے وکیل وزارت دفاع کو ہدایت کی کہ 9 مئی مقدمات سے ہٹ کرملٹری کورٹس کے فیصلوں کی مثالیں بھی دیں۔
جسٹس حسن اظہر نے سوال کیا کیس کنڈیکٹ کرنے والے کا تجربہ ہوتا ہے یا پہلی بار بٹھایا جاتا ہے؟ دفاعی آفیسر کا کوئی تجربہ ہوتا یا یا نہیں؟ جج ایڈووکیٹ عدالت میں موجود ہوتا ہے، کیاکورٹ مارشل کر سکتا ہے؟ وکیل وزارت دفاع نے جواب دیا جی ججز کے ساتھ ہی جج ایڈووکیٹ بیٹھتا ہے۔
جسٹس مسرت نے کہاسوال یہ ہے ان فیصلوں کا عام شہریوں پرکیا اثر پڑے گا؟ ہمیں ایک بےلگام معاشرے کا سامنا ہے۔
جسٹس مندوخیل نے کہاسیشن جج 20، 20 سال محنت کے بعد سیشن جج بنتے ہیں، آج کل ہمارا ملک اتنا ٹرین ہوچکا ہےکہ 8 ججزکےفیصلےکو 2ججزکہتے ہیں غلط ہے۔
دوران سماعت وکیل وزارت دفاع نے کہا کہ ملٹری کورٹ میں آزادنہ اورغیرجانبدرانہ ٹرائل ہوتاہے، پبلک کوسماعت سننےکا مکمل موقع دیا جاتا ہے اور فیئرٹرائل کے تقاضے پورے کیےجاتےہیں، ملٹری کورٹس آزاد ہیں۔
اس پر جسٹس جمال مندوخیل نے کہا کہ انصاف صرف ہونا نہیں چاہیے بلکہ ہوتا ہوا بھی نظر آنا چاہیے جبکہ وکیل درخواست گزار نے کہا کہ اگر ملٹری ٹرائل اتنا ہی اچھا ہے تو پھرسارے کسیز ان کو بھجوا دیں۔
جسٹس جمال مندوخیل نے کہا کہ ملٹری کورٹس میں ٹرائل کرنےوالےکون ہیں؟ ملٹری ٹرائل کرنے والا جج تو اتھارٹیز کے ماتحت ہوتاہے۔
جسٹس حسن اظہر نے کہا کہ آپ کی جانب سے دیے گئےریکارڈکاجائزہ لیاگیا، 9 مئی واقعات میں بظاہرسکیورٹی آف اسٹیٹ کا معاملہ نہیں لگتا،9 مئی واقعات کےملزمان کا ملٹری ٹرائل بہت تفصیل سےچلایاگیا،کیا تمام ریکارڈ پبلک کرنا ممکن نہیں تاکہ 9 مئی واقعات کے ملزمان کےکارنامےعوام میں بے نقاب ہونے ہوں اور پبلک ان ملزمان کی مذمت کر سکے اس پر وکیل وزارت دفاع نے جواب دیا یہ تو اتھارٹیز نے طے کرنا ہے۔
جسٹس مندوخیل نے کہا کیا آرٹیکل 175 کےتحت ملٹری کورٹس کےقیام کےلیے گنجائش رکھی گئی ہے؟ وکیل وزارت دفاع نے کہا ایساہوا تو ملٹری کورٹس سے متعلق جتنے بھی فیصلے دیےگئے ان پرنظرثانی کرناپڑےگی، آئین میں قانون کےتحت عدالتوں کےقیام کاذکرہے،کئی ممالک میں ملٹری کورٹس ہیں۔
جسٹس مندوخیل نے کہا کہ نارکوٹکس کا پورا کنٹرول فوج کے پاس ہے، نارکوٹکس میں ٹرائل چلاناہوتاہےتو متعلقہ چیف جسٹس سےسیشن جج مانگاجاتاہے، کیاملٹری کورٹس میں ایساہوتا، اس پر وکیل وزارت دفاع نے جواب دیا تمام عدالتی فیصلوں میں ملٹری کورٹس کوآرٹیکل 175 سےالگ رکھاگیاہے۔
جسٹس جمال مندوخیل نے کہا کہ ملٹری کورٹس میں ٹرائل کرنےوالےکون ہیں؟ ملٹری ٹرائل کرنے والا جج تو اتھارٹیز کے ماتحت ہوتاہے۔
سماعت کے دوران وکیل وزارت دفاع خواجہ حارث نےلفافوں میں ملٹری ٹرائل کا ریکارڈ آئینی بینچ میں پیش کردیا اور ملٹری ٹرائل کی 7 کاپیاں آئینی بینچ کے ساتوں ججز کو مہیا کردی گئیں۔
اس موقع پر وکیل وزارت دفاع نے کہا کہ عدالت ٹرائل کاطریقہ کاردیکھ لے، ٹرائل سے قبل پوچھا گیاکسی کو پریذائڈنگ آفیسر پرکوئی اعتراض تونہیں جس پر کسی نے بھی پریذائڈنگ آفیسر پرکوئی اعتراض نہیں کیا۔
اس موقع پر جسٹس مندوخیل نے کہا کہ ریکارڈ تو اپیل میں دیکھا جانا ہے، ہمارے لیےاسکا جائزہ لینامناسب نہیں، جسٹس امین الدین نے کہا ہم ٹرائل کو متاثر نہیں ہونے دیں گے۔
بعد ازاں آئینی بینچ کے6 ججز نےٹرائل کا ریکارڈ وزارت دفاع کے وکیل خواجہ حارث کو واپس کردیا۔
