امریکی فضائیہ کا جدید ترین لڑاکا طیارہ ایف 35 ایئر بیس کے قریب گر کر تباہ ہو گیا۔
غیر ملکی میڈیا کے مطابق امریکی فضائیہ کا ایف 35 لڑاکا طیارہ الاسکا میں امریکی ائیر فورس بیس پر گر کر تباہ ہوا تاہم ایک نشست والے لڑاکا طیارے کا پائلٹ طیارے کے تباہ ہونے سے پہلے بچ نکلنے میں کامیاب رہا۔
امریکی لڑاکا طیارے کے تباہ ہونے کی ویڈیو بھی منظر عام پر آگئی، جس میں طیارے کو قلابازیاں کھاتے ہوئے زمین کی طرف آتے اور گر کر تباہ ہوتے دیکھا جاسکتا ہے۔
سوشل میڈیا پر وائرل ویڈیوز میں امریکی طیارے کے تباہ ہونے کے بعد آگ کے بادل بنتے بھی دیکھا جاسکتا ہے جبکہ پائلٹ پیراشوٹ کے ذریعے باہر نکلتا صاف نظر آرہا ہے۔
امریکی فضائیہ کے حکام نے طیارے کے حادثے کو بڑی تباہی قرار دیتے ہوئے کہا کہ ہماری اولین ترجیح ہمارے جوان ہیں اور ہم اپنے اہلکاروں کی سیفٹی کو ہر صورت یقینی بنائیں گے۔
امریکی فضائیہ کے حکام کا کہنا ہے طیارہ حادثے کی تحقیقات کو ہر صورت یقینی بنائیں گے تاکہ آئندہ اس قسم کے حادثات کو کم سے کم کیا جاسکے۔
خیال رہے کہ ایف 35 امریکا کا جدید ترین لڑاکا طیارہ ہے، جسے ایف 16 فائٹنگ فالکنز اور اے 10 تھنڈر بولٹ ٹو کی جگہ امریکی فوج کے حوالے کیا گیا تھا۔
ایئر اینڈ اسپیسس فورسز میگزین کی رپورٹ کے مطابق جدید ترین لڑاکا ایف 35 طیارے کی مالیت 81 ملین ڈالر ہے اور اس وقت الاسکا کی ایئر فورس بیس پر 54 ایف 35 طیارے کھڑے ہیں۔
