پاک فوج کی ملک کے لئے قربانیاں کسی سے ڈھکی چھپی نہیں۔ فوجی جوان ہر دم ملک کی حفاظت اور بقاء کےلئے اپنی جان قربان کرنے کو تیار رہتے ہیں۔ ہمارے شہداء نے اپنے خون سے آبیاری کر کے وطن عزیز کی بنیادوں کو مضبوط کیا۔ وطن کیلئے جان کا نذرانہ پیش کرنے والے شہداء کو پوری قوم خراجِ عقیدت پیش کرتی ہے۔
دفاع وطن کے لئے دی جانے والی لازوال قُربانیاں افواجِ پاکستان کی میراث ہیں۔ وطن سے محبت میں جان نچھاور کرنا پاک فوج کے سپاہیوں کی پہچان ہے۔ جان قربان کرنے والے عظیم سپوتوں کی قربانیوں نے پاکستان کی بنیادوں کو مضبوط کیا۔ وطن سے محبت پاک فوج کے جوانوں کی میراث ہے۔
حوالدار شوکت علی دفاع وطن میں جان قربان کر کے امر ہو گئے، حوالدار شوکت علی شہید 9 نومبر 2024 کو صوبہ بلوچستان میں شہادت کے عظیم رتبے پر فائز ہوئے۔ حوالدار شوکت علی شہید نے سوگواران میں والدین، بھائی اور بیوہ چھوڑے۔
حوالدار شوکت علی شہید کے والدہ نے اپنے احساسات و جذبات کا اظہار کرتے ہوئے کہا کہ بیٹے کی کمی بہت محسوس ہوتی ہے، فخر ہے کہ میرا بیٹا وطن کی حفاظت کرتے ہوئے شہید ہوا، بیٹے کی عظیم قربانی نہ صرف ہمارے خاندان بلکہ پوری قوم کے لیے فخر کا باعث ہے۔ اللہ ہمارے جوانوں کو دشمن سے لڑنے کا جذبہ اور طاقت دے۔
شہید کی بیوہ کا کہنا ہے کہ شوہر کے ساتھ جتنا بھی وقت گزار، بہت اچھا اور خوشگوار گزرا، دہشتگردوں کو پیغام دینا چاہتی ہوں کہ پاک فوج کے جوان تمہاراخاتمہ کر کے رہیں گے۔
حوالدار شوکت علی شہید کے بھائی نے کہا کہ بھائی بہت ملنسار تھا اور ہر کسی سے بہت ادب اور اخلاق سے ملتا تھا، بھائی کی شہادت نے پورے علاقے میں ہمارا سر فخر سے بلند کر دیا۔ ہمیں اور ہمارے علاقے کو بہت فخر ہے کہ ہمارے رشتہ داروں میں یہ پہلی شہادت ہے، اللہ پاک میرے بھائی کی شہادت کو قبول فرمائے۔ حوالدار شوکت علی شہید کی قربانی ہمارا سرمایہ ہے۔
