وزیراعلیٰ پنجاب نے غیرقانونی ہاؤسنگ سوسائٹیز کے سدباب کیلئے پنجاب اسپیشل پلاننگ اتھارٹی قائم کرنے کا اصولی فیصلہ کرلیا جبکہ اضلاع میں ڈسٹرکٹ اسپیشل پلاننگ کمیٹیوں کے قیام پر بھی اتفاق کرلیا گیا۔
وزیراعلی پنجاب مریم نواز نے غیر قانونی ہاؤسنگ سوسائٹیز کے سدباب کیلئے منفرد قدم اٹھاتے ہوئے پنجاب اسپیشل پلاننگ اتھارٹی قائم کرنے کا اصولی فیصلہ کرلیا۔
رپورٹ کے مطابق اتھارٹی کے ذریعے کمرشل، رہائشی اور زرعی زمینوں کی زوننگ کی جائے گی، پی ایس پی اے ڈسٹرکٹ لینڈ یوز پلان اور زوننگ کرے گی، جسے ہر 4 سال میں ریویو کیا جائے گا۔
مریم نواز کی زیر صدارت اجلاس میں اضلاع میں ڈسٹرکٹ اسپیشل پلاننگ کمیٹیوں کے قیام پر اتفاق کرلیا گیا، متعلقہ ڈپٹی کمشنر متعلقہ ڈسٹرکٹ اسپیشل کمیٹی کے سربراہ ہوں گے، واپڈا، سوئی گیس، واسا سمیت سروسز فراہم کرنے والے دیگر اداروں کے نمائندے بھی ڈسٹرکٹ اسپیشل کمیٹی میں شامل ہوں گے۔
اس اقدام سے ڈسٹرکٹ ڈیجیٹل وال کے ذریعے اراضی کے غلط استعمال کی نشاندہی ہوگی، ڈیجیٹل ڈیٹا کی بنیاد پر درخواستوں کی فاسٹ ٹریک پر منظوری کا فیصلہ بھی کیا جاسکے گا۔
وزیراعلیٰ پنجاب نے ہاؤسنگ سیکٹر کی زیر التواء درخواستیں فوری طور پر نمٹانے کا حکم دیدیا، وزیراعلیٰ نے لاہور ڈیولپمنٹ پلان پر پیشرفت کا جائزہ لینے کیلئے روزانہ تفصیلی رپورٹ طلب کرلی۔
بریفنگ میں بتایا گیا کہ پلان میں ای ٹینڈرنگ سے کروڑوں روپے کی بچت ممکن ہوئی، پلان کے فیز ون کے تحت 414 اسکیموں پر پیشرفت کی رپورٹ پیش کی گئی۔
وزیراعلیٰ مریم نواز نے کہا کہ ٹاؤن پلاننگ مستحکم مستقبل کی ضمانت ہوتی ہے، ناقص حکمت عملی کی وجہ سے اربن ایریاز میں بے ہنگم غیرقانونی ہاؤسنگ سوسائٹیاں بن رہی ہیں۔
