پاکستان تحریک انصاف ( پی ٹی آئی ) نے پیکا ایکٹ کو عدالت میں چیلنج کرنے کا اعلان کردیا۔
سینیٹ اجلاس سے پیکا ترمیمی بل کی منظوری کے بعد پارلیمنٹ ہاؤس کے باہر میڈیا سے گفتگو پی ٹی آئی رہنماؤں سینیٹر شبلی فراز اور سنیٹیر علی ظفر نے پیکا ایکٹ پر کڑی تنقید کی ہے اور ایکٹ کو عدالت میں چیلنج کرنے کا اعلان بھی کیا۔
قائد حزب اختلاف سینیٹر شبلی فراز کا کہنا تھا کہ پیکا بل کو عجلت میں پاس کرایا گیا اور پارلیمنٹ اپنی ساکھ کھو چکی ہے جبکہ پارلیمنٹیرینز بھی غیر ضروری ہوگئے ہیں۔
شبلی فراز کا کہنا تھا کہ ایوان میں قائد حزب اختلاف کو بولنے کی اجازت نہیں دی گئی اور اپوزیشن کو مکمل طور پر نظر انداز کیا جا رہا ہے جو لمحہ فکریہ ہے۔
اس موقع پر بیرسٹر علی ظفر کا کہنا تھا کہ ایوان میں ہماری بات نہیں سنی گئی اور زبردستی قانون منظور کرالیا۔
بیرسٹر علی ظفر کا کہنا تھا کہ بل کا ٹارگٹ صحافی اورہر وہ شخص ہے جو سچ کی کھوج لگانا چاہتا ہے، ہم پیکا ایکٹ کو عدالت میں چیلنج کریں گے۔
ان کا مزید کہنا تھا کہ ہماری بات مانی ہی نہیں گئی اور ہماری ترامیم کو مسترد کردیا گیا۔
