صدر مملکت آصف علی زرداری کا کہنا ہے کہ بھارت کشمیریوں کو جبر، تشدد اور بربریت کا نشانہ بنا رہا ہے، کشمیریوں کی جدوجہد ِآزادی کو دبایا نہیں جا سکتا۔
کشمیریوں کے یوم حق خودارادیت پر خصوصی پیغام میں صدر پاکستان آصف علی زرداری نے کہا ہے 7 دہائیوں سے زیادہ عرصہ بیت چکا۔ بھارت نے مقبوضہ جموں و کشمیر کے عوام کو حق خود ارادیت سے محروم کر رکھا ہے، لیکن انسانیت سوز مظالم کے باوجود کشمیری عوام کا جذبہ اٹوٹ ہے، اور ان کی جدوجہد ِآزادی کو دبایا نہیں جا سکا۔
صدر مملکت نے کہا ہے آج دنیا بھر کے کشمیری اقوامِ متحدہ کے کمیشن برائے ہندوستان اور پاکستان کی جانب سے منظور کردہ قرارداد کی 76 ویں سالگرہ منا رہے ہیں، قرارداد عالمی قوانین اور انسانی حقوق کے معاہدوں کے مطابق کشمیریوں کے ناقابل ِتنسیخ حق ِخودارادیت کا اعادہ کرتی ہے، عالمی برادری مقبوضہ جموں و کشمیر کے لوگوں کو ان کا ناقابل تنسیخ حق ِخود ارادیت دلانے کی ذمہ دار ہے۔
آصف علی زرداری کا کہنا تھا کہ بھارت کشمیریوں کو جبر، تشدد اور بربریت کا نشانہ بنا رہا ہے، پانچ اگست 2019 سے بھارت ایسے اقدامات کر رہا ہےجن کا مقصد مقبوضہ جموں و کشمیر کے آبادیاتی اور سیاسی ڈھانچے کو بدلنا ہے۔
صدر مملکت نے کہا پاکستان کشمیری عوام کی منصفانہ جدوجہد اور حق ِخودارادیت کے حصول میں ان کی مکمل سیاسی، سفارتی اور اخلاقی حمایت جاری رکھے گا۔
