اسلام آباد کی انسدادِ دہشت گردی عدالت نے پی ٹی آئی کے 26 نومبر احتجاج سے متعلق 13 مقدمات میں ڈھائی سو ملزمان کی ضمانت کی درخواستیں منظور جبکہ ڈیڑھ سو ملزمان کی درخواستیں خارج کردیں۔
اسلام آباد کی انسدادِ دہشت گردی عدالت میں پی ٹی آئی کے 26 نومبر احتجاج کے مقدمات کی سماعت ہوئی۔ عدالت نے مختلف تھانوں کے 13 مقدمات میں 250 ملزمان کو پانچ، پانچ ہزار روپے مچلکوں پر ضمانت دے دی۔
تھانہ بنی گالا کے مقدمے میں 18 ملزمان کی ضمانت بعد از گرفتاری منظور کی گئی۔ تھانہ کوہسار کے مقدمہ نمبرایک ہزار بتیس میں 43 ملزمان کو ضمانت دی گئی جبکہ ایک کی درخواست مسترد کردی گئی۔
تھانہ شہزاد ٹاؤن کے مقدمے میں نو ملزمان اور تھانہ نون کے مقدمے میں 17 ملزمان کی ضمانتیں منظور کی گئیں جبکہ ایک ملزم کی درخواست خارج کر دی گئی۔ تھانہ آبپارہ کے مقدمےمیں 70 ملزمان کو ضمانت دی گئی جبکہ 25 کی درخواستیں مسترد کر دی گئیں۔
اسی طرح تھانہ آئی نائن کے مقدمے میں 23 تھانہ مارگلہ کے مقدمے میں 13 ملزمان اور تھانہ سہالہ کے 25 ملزمان کو ضمانت دی گئی۔ تھانہ سیکرٹریٹ کے دو مقدمات میں 120 ملزمان کی درخواستیں خارج کر دی گئیں، جبکہ 10 ملزمان کو ضمانت ملی۔ ملزمان کے خلاف اسلام آباد کے 10 تھانوں میں 13 مقدمات درج ہیں۔
