پاکستان سپر لیگ (پی ایس ایل) سیزن 10 کی ڈرافٹنگ کا وینیو تبدیل کردیا گیا۔ ڈرافٹنگ کی تقریب بادشاہی مسجد اور شاہی قلعہ لاہور کے درمیان کروانے کی تیاریاں جاری ہے۔
ذرائع کے مطابق پی ایس ایل سیزن 10 کی ڈرافٹنگ کا وینیو گوادر سے لاہور منتقل کردیا گیا، پی ایس ایل مینجمنٹ نے پروڈکشن کمپنی اور براڈکاسٹرز کو لاہور میں بہترین لوکیشن کا تعین کرنی کی ذمہ داری سونپ دی۔
پی ایس ایل ڈرافٹنگ تقریب کو بادشاہی مسجد اور شاہی قلعہ لاہور کے درمیان بارہ دری میں اوپن ائیر کئے جانے کا امکان ہے۔ ڈرافٹنگ تقریب اوپن ائیر کروانے کا مقصد بیک گراونڈ پر بادشاہی مسجد کے مناظر دکھانا ہے۔
پی ایس ایل مینجمنٹ ذرائع کا کہنا ہے کہ پی ایس ایل سیزن 10 کی ڈرافٹنگ تقریب کو یاد گار بنانا چاہتے ہیں ، پی ایس ایل ڈرافٹنگ تقریب میں ڈرون کا استعمال زیادہ سے زیادہ کرنے کی ہدایات جاری کردی گئی۔ ذرائع کے مطابق اوپن ائیر اور سردی سے نمٹنے کے لئے اسٹینڈ والے ہیٹرز کا استعمال کیا جائے گا۔
خیال رہے کہ پی ایس ایل ڈرافٹنگ کی تقریب 11 جنوری کو گوادر میں شیڈول تھی تاہم پی ایس ایل فرنچائزز کے تحفظات کی وجہ سے ڈرافٹنگ تقریب کو لاہور منتقل کیا جارہا ہے۔ پی ایس ایل مینجمنٹ آج ڈرافٹنگ تقریب کے حوالے سے حتمی فیصلہ کرے گی اعلان بھی متوقع ہے۔
