پاکستان اسپورٹس بورڈ نے اولمپکس اور دیگر عالمی مقابلوں میں میڈل حاصل کرنیوالے کھلاڑیوں کیلئے انعامی رقم میں اضافے کا نوٹیفکیشن جاری کردیا۔
پاکستان اسپورٹس بورڈ نے عالمی مقابلوں کے میڈلسٹ کھلاڑیوں کیلئے انعامی رقم میں اضافے کا نوٹیفکیشن جاری کردیا، جس کے تحت سمر، ونٹر اور پیرا اولمپکس گیمز کے گولڈ میڈلسٹ کو اب ایک کروڑ روپے انعام ملے گا۔
نوٹیفکیشن کے مطابق اولمپکس میں چاندی کا تمغہ جیتنے پر 75 لاکھ روپے اور کانسی کے تمغے پر 50 لاکھ روپے انعام دیا جائے گا، جبکہ ایشین گیمز کے گولڈمیڈلسٹ کو 75 لاکھ، سلور میڈلسٹ کو 50 لاکھ اور برانز میڈلسٹ کو 30 لاکھ روپے ملا کریں گے۔
پی ایس بی کے مطابق کامن ویلتھ گیمز میں سونے کا تمغہ جیتنے پر 50 لاکھ، چاندی کے تمغے پر 30 لاکھ اور کانسی کا تمغہ جیتنے والے کھلاڑی کو 20 لاکھ روپے انعام ملے گا جبکہ اسپیشل اولمپکس ورلڈ گیمز کیلئے بالترتیب 5 لاکھ، 3 لاکھ اور 2 لاکھ روپے انعام رکھا گیا ہے۔
نوٹیفکیشن کے مطابق بلائنڈ ورلڈ گیمز اور ڈیف اولمپکس کے میڈلسٹ کو مختلف کیٹیگریز میں 20 لاکھ، 10 لاکھ اور 5 لاکھ انعام ملے گا جبکہ کامن ویلتھ اور اسلامک سولیڈیریٹی گیمز میں پیرا ایتھلیٹس کو گولڈ میڈل جیتنے پر 50 لاکھ روپے ملیں گے۔
پاکستان اسپورٹس بورڈ کے جاری نوٹیفکیشن کے مطابق ایشین چیمپئن شپ میں گولڈ میڈل جیتنے والے ایتھلیٹس کو 20 لاکھ روپے کی انعامی رقم دی جائیگی، نیشنل گیمز اور قائداعظم گیمز کے انفرادی گولڈ میڈل ونرز کو 10 لاکھ روپے ملیں گے، چاندی اور کانسی کے تمغے جیتنے والوں کو بدستور 5 لاکھ اور 2 لاکھ 50 ہزار روپے کا انعام ملے گا۔
نیشنل گیمز اور قائداعظم گیمز کے ٹیم ایونٹ کے میڈلسٹس کا انعام 5 لاکھ، ڈھائی لاکھ اور ایک لاکھ روپے کردیا گیا ہے۔
اسپورٹس بورڈ کے مطابق کیش ایوارڈ پالیسی کے تحت تمام میڈلسٹس کو گولڈ کارڈ بھی جاری ہوگا، گولڈ کارڈ ہولڈر پی ایس بی اور کوچنگ سینٹرز کی تمام سہولیات پاسکیں گے۔
