پاکستان مسلم لیگ ( ن ) کے رہنما اور قومی اسمبلی میں سابق اپوزیشن لیڈر راجا ریاض نے دعویٰ کیا ہے کہ ن لیگ عام انتخابات میں کلین سوئپ کرے گی۔
فیصل آباد میں سماء سے خصوصی گفتگو کرتے ہوئے راجا ریاض کا کہنا تھا کہ سابق وزیر اعظم نواز شریف کو ضمانت ملنے پر قوم کو مبارک باد دیتا ہوں۔
یاد رہے کہ جمعرات کو احتساب عدالت کی جانب سے توشہ خانہ کیس اور اسلام آباد ہائی کورٹ کی جانب سے العزیزیہ اور ایون فیلڈ ریفرنس میں مسلم لیگ ( ن ) کے قائد نواز شریف کی حفاظتی ضمانتیں منظور کی گئی ہیں۔
یہ بھی پڑھیں۔نواز شریف کی العزیزیہ ، ایون فیلڈ ریفرنس میں حفاظتی ضمانت منظور، توشہ خانہ کیس میں وارنٹ معطل
احتساب عدالت اور اسلام آباد ہائی کورٹ کی جانب سے قومی احتساب بیورو ( نیب ) کو نواز شریف کو وطن واپسی پر گرفتار نہ کرنے کا حکم دیا گیا۔
راجا ریاض کا کہنا تھا کہ 21 اکتوبر کو لاہور میں مینار پاکستان پر ہونے والا نوازشریف کا جلسہ اب تک کا سب سے بڑا جلسہ ہو گا کیونکہ مسلم لیگ ن اپنی سیاسی ساکھ بحال کر چکی ہے اور لوگ بہت پرجوش ہیں۔
انہوں نے کہا کہ اب لوگوں کی ایک ہی امید ہے اور وہ نواز شریف ہیں۔
انہوں نے یہ دعویٰ بھی کیا کہ مسلم لیگ ( ن ) آئندہ عام انتخابات میں کلین سوئپ کرے گی اور نواز شریف چوتھی مرتبہ پاکستان کے وزیر اعظم بنیں گے۔
