وفاق المدارس کی جانب سے ملک بھر میں عوامی رابطہ مہم شروع کرنے کا فیصلہ کرلیا گیا۔
منگل کو مفتی تقی عثمانی کی زیر صدارت وفاق المدارس کی مرکزی مجلس عاملہ کا اجلاس ہوا جس میں جمعیت علماء اسلام ( جے یو آئی ) کے امیر مولانا فضل الرحمٰن نے بطور خاص شرکت کی ۔
مجلس عاملہ نے اتحاد تنظیمات مدارس دینیہ کے فیصلوں اور موقف کی توثیق کرتے ہوئے ملک بھر میں عوامی رابطہ مہم شروع کرنے کا فیصلہ کیا۔
اجلاس کے اعلامیہ کے مطابق جمعہ کے اجتماعات اور مدارس کے سالانہ پروگراموں میں عوام کو موقف سے آگاہ کیا جائے گا۔
اعلامیہ میں مطالبہ کیا گیا کہ مدارس رجسٹریشن بل ایکٹ بن چکا ہے ، فوری گزٹ نوٹیفکیشن جاری کیا جائے۔
مدارس کے معاملات میں رکاوٹیں اور تاخیری حربے قابل قبول نہیں، مدارس کے جملہ مسائل کو فوری حل کیا جائے اور مدارس کے تمام حقیقی بورڈز اور تنظیمیں ایک پیج پر ہیں جبکہ تمام مکاتب فکرکی باہمی مشاورت سے مشترکہ اور متفقہ لائحہ عمل کا اعلان کیا جائے گا۔
اعلامیہ میں مزید کہا گیا کہ وفاق المدارس کی مجلس عاملہ نے تعلیمی اور امتحانی امور پر بھی متعدد فیصلے کئے ہیں۔
