وفاقی حکومت نے بیرون ملک سے کمرشل مقدار میں اشیا ساتھ لانے پر مکمل پابندی عائد کرنے کا فیصلہ کرلیا۔
فیڈرل بورڈ آف ریونیو ( ایف بی آر ) نے بیگج اسکیم میں ترمیم سے متعلق نوٹیفکیشن جاری کردیا ہے جس کے مطابق بیرون ملک سے ذاتی استعمال کیلئے ایک موبائل فون لانے کی اجازت ہوگی اور دیگر تمام فون ضبط کر لیے جائیں گے۔
ایف بی آر کے مطابق 1200 ڈالر سے زائد مالیت کی اشیا کمرشل تجارت تصور ہوگی اور اضافی اشیا ڈیوٹی ، ٹیکس اور جرمانہ ادا کرنے کے باوجود بھی کلیئر نہیں ہونگی۔
قوانین میں ترامیم سے متعلق 7 روزمیں سفارشات دی جاسکتی ہیں اور مقررہ میعاد کے بعد موصول ہونیوالی تجاویز قابل قبول نہیں ہوں گی۔
ایف بی آر کی جانب سے مزید کہا گیا کہ کمرشل مقدار کا مطلب ذاتی استعمال اور گفٹ کے بجائے اضافی مالی فائدہ اٹھانا ہے۔
