ملک کے مختلف علاقوں میں سردی کی شدت میں اضافہ ہوگیا ہے، بالائی علاقوں میں وقفے وقفے سے بارش اور برفباری سے وادیوں نے برف کی سفید چادر اوڑھ لی۔
ملک کے بالائی علاقوں میں برف باری کا سلسلہ وقفے وقفے سے جاری ہے، مشہور سیاحتی مقام ناران، کاغان، شوگران، وادی نیلم سمیت آزاد کشمیر کے پہاڑوں پر برف باری سے سردی کی شدت میں مزید اضافہ ہوگیا ہے، استور اور مری میں بھی برف باری جاری ہے۔
مانسہرہ کے بالائی علاقوں کاغان، ناران میں رات گئے برفباری کا سلسلہ وقفے وقفے سے جاری رہا، شوگراں روڈ سے برف ہٹا دی ۔۔پھنسی گاڑیوں کو نکال دیا گیا، ترجمان کاغان ڈیولپمنٹ اتھارٹی کے مطابق ناران بازار میں ایک انچ تک برف پڑچکی ہے۔
آزاد کشمیر 8 مقام کے بالائی علاقوں جاگراں، لوات بالا، اڑنگ کیل، گریس، شونٹر میں برف باری جب کہ زیریں علاقوں میں بارش جاری ہے۔
گلگت بلتستان کے ضلع استور میں برف باری سے موسم سرد ہے، ملکہ کوہسار مری میں بھی بارش اور موسم سرما کی پہلی برفباری ہوئی، جس کے باعث سیاحوں نے بھی بڑی تعداد میں ملکہ کوہسار کارخ کرلیا جبکہ غذر میں درجہ حرارت منفی 7 ڈگری سینٹی گریڈ تک گرگیا۔
پنجاب میں اوکاڑہ اور میانوالی میں دسمبر کی پہلی بارش ہوئی جبکہ کراچی میں بھی موسم سرد ہوگیا، صبح سویرے درجہ حرارت 12 ڈگری تک گرگیا۔
دوسری جانب محکمہ موسمیات نے ملک کے بیشتر علاقوں میں 14 دسمبر تک شدید سردی پڑنے کی پیش گوئی کی ہے۔ ملک کے بیشتر علاقے سردی کی لہر کے زیر اثر رہیں گے۔
اس عرصے کے دوران اسلام آباد اور گردونواح میں آج موسم سرد اور خشک رہے گا، خیبرپختونخوا کے میدانی علاقوں میں صبح کے وقت کُہرا پڑنے کی توقع ہے، جنوبی پنجاب کے مختلف اضلاع میں دُھند پڑنے کا امکان ہے، بلوچستان کے بیشتر اضلاع میں موسم خشک،سرد ہوائیں چلیں گی۔
