وزیراعظم کے مشیر برائے پولیٹیکل امور رانا ثناء اللہ کے ناقابل ضمانت وارنٹ گرفتاری جاری ہوگئے۔
جوڈیشل مجسٹریٹ گوجرانوالہ سدرہ گل نواز نے ن لیگی رہنما رانا ثناء اللہ کے ناقابل ضمانت وارنٹ گرفتاری جاری کرتے ہوئے انہیں 12 دسمبر کو گرفتار کر کے پیش کرنے کا حکم دیا ہے۔
رانا ثناء اللہ کے خلاف تھانہ سیٹلائٹ ٹاؤن میں درج مقدمہ عدالت میں زیر سماعت ہے جبکہ مقدمہ 16 اکتوبر 2020 کو گوجرانوالہ میں پی ڈی ایم جلسے کے روز درج کیا گیا تھا اور ان پر ایف آئی آر میں کنٹینر ہٹانے اور پولیس اہلکاروں پر گاڑی چڑھانے کا الزام ہے۔
مقدمہ میں لیگی رہنما خرم دستگیر ، عمران خالد بٹ اور سلمان خالد بٹ پہلے ہی بری ہو چکے ہیں۔
پولیس نے رانا ثناء اللہ سے متعلق مقدمہ کا چالان تاخیر سے جمع کروایا تھا اور رانا ثناءاللہ کو بے گناہ قرار دیتے ہوئے 173 کی رپورٹ عدالت میں جمع کروائی جس کے بعد عدالت نے پولیس رپورٹ کو مسترد کرتے ہوئے رانا ثناء اللہ کو طلب کیا تھا۔
عدالت کے طلب کرنے کے باوجود مسلسل غیر حاضری پر ناقابل ضمانت وارنٹ گرفتاری جاری کیے گئے ہیں۔
