قومی کرکٹ ٹیم کے باؤلر سفیان مقیم نے پاکستان کے لیے ٹی 20 میں بہترین باؤلنگ کا ریکارڈ بنا دیا۔
سفیان مقیم پاکستان کی جانب سے ٹی 20 میں بہترین باؤلنگ کرنے والے کرکٹر بن گئے ہیں اور انہوں نے یہ اعزاز زمبابوے کے خلاف دوسرے ٹی 20 میچ میں اپنے نام کیا۔
سفیان مقیم نے زمبابوے کے خلاف 2.4 اوورز میں صرف 3 رنز کے عوض 5 وکٹیں حاصل کیں اور پاکستان کے لئے بہترین باؤلنگ کا ریکارڈ اپنے نام کیا۔
نوجوان باؤلر نے قومی ٹیم کے سابق فاسٹ باؤلر عمر گل کا ریکارڈ بھی توڑا۔
اس سے قبل عمر گل نے 6 رنز دے کر 5 وکٹیں حاصل کی تھیں اور پاکستان کے لئے ٹی 20 میچ میں بہترین باؤلنگ کرنے والے باؤلر تھے۔
یاد رہے کہ نوجوان باؤلر سفیان مقیم کی شاندار باؤلنگ کی بدولت زمبابوے کی پوری ٹیم محض 57 رنز ڈھیر ہوئی۔
