تحریک انصاف کے رہنما اسد قیصر نے سات دسمبر کو احتجاج کی کوئی کال نہیں دی۔ ترجمان پی ٹی آئی شیخ وقاص اکرم نے اسد قیصر سے منسوب خبروں کی سختی سے تردید کردی ہے۔
ترجمان پی ٹی آئی نے سماء سے گفتگو میں کہا آج وکلا کو عدالت سے بانی پی ٹی آئی سے ملاقات کی اجازت مل گئی، اگلے مرحلے میں سیاسی قائدین کی بانی پی ٹی آئی سے ملاقات کی کوشش ہوررہی ہے ، کسی نئے احتجاج کا اعلان نہیں کیا گیا۔
شیخ وقاص اکرم نے کہا کہ بانی چئیرمین کی ہدایت کے بعد ہی اگلا لائحہ عمل طے ہوگا ،شیخ وقاص اکرم کا یہ بھی کہنا تھا کہ حامد رضا تحریک انصاف کے مشکل وقت کے ساتھی ہیں،وہ اتحادی تھے اور رہیں گے۔
دوسری جانب وزیر دفاع خواجہ آصف کے بیان پر تحریک انصاف نے سخت ردعمل جاری کیا ہے، ترجمان نے اپنے بیان میں کہا ہے 24 کروڑ غیور عوام کو میدان سے بھاگنے کے طعنے دیئے جارہے ہیں، گولیاں لگنے کے باوجود جوابی حملے نہ کرکے کارکنان نےظالموں کو بے نقاب کیا، نہتے شہریوں کا خون بہانے والوں کےجھوٹ کا پول کھل چکا۔ ترجمان پی ٹی آئی کا کہنا ہے مینڈیٹ چوروں کے سرپرستوں کا کچا چٹھا بھی عوام کے سامنے آچکا ہے۔
