پنجاب پولیس کی جانب سے لاہور ہائیکورٹ میں بانی پاکستان تحریک انصاف ( پی ٹی آئی ) عمران خان کیخلاف صوبے بھر میں درج مقدمات کی رپورٹ جمع کرادی گئی۔
منگل کو لاہور ہائیکورٹ میں جسٹس فاروق حیدر نے بانی پی ٹی آئی کیخلاف مقدمات کی تفصیلات کیلئے دائر درخواست پر سماعت کی جس کے دوران پنجاب پولیس کی جانب سے رپورٹ عدالت میں پیش کردی گئی۔
رپورٹ کے مطابق بانی پی ٹی آئی پر پنجاب بھر میں 54 مقدمات درج ہیں۔
عدالت عالیہ کی جانب سے وفاقی تحقیقاتی ادارے ( ایف آئی اے ) سے بھی اس حوالے سے رپورٹ طلب کرلی گئی ہے۔
بعدازاں، عدالت کی جانب سے کیس کی مزید سماعت 20 نومبر تک ملتوی کردی گئی۔
خیال رہے کہ بانی پی ٹی آئی کی بہن نورین نیازی کی جانب سے درخواست دائر کی گئی تھی جس میں انہوں نے موقف اختیار کیا تھا کہ عمران خان کو سیاسی انتقام کا نشانہ بنایا جا رہا ہے اور آئے روز مقدمات میں ملوث کیا جَاتا ہے۔
درخواست میں استدعا کی گئی کہ عدالت متعلقہ حکام سے درج مقدمات کی تفصیلات فراہم کرنے کا حکم دے اور کسی بھی نامعلوم مقدمے میں گرفتار نہ کرنے کا حکم دیا جائے۔
