بانی پی ٹی آئی عمران خان نے عدالتی حکم کے باوجود سیاسی رہنماؤں سے ملاقات نہ کرانے پر اسلام آباد ہائی کورٹ میں توہین عدالت کی درخواست دائر کر دی۔
ایڈووکیٹ سلمان اکرم راجہ اور فیصل چوہدری کی وساطت سے دائر درخواست میں سیکرٹری داخلہ، ہوم سیکرٹری پنجاب اور سپرنٹنڈنٹ اڈیالہ جیل کو بھی فریق بنایا گیا ہے۔
درخواست میں مؤقف اپنایا گیا کہ عدالتی حکم کے مطابق بانی پی ٹی آئی نے اپنے دستخط سے ملاقات کرنے والوں کی فہرست فراہم کی جس میں عمر ایوب، شبلی فراز، اور اسد قیصر سمیت چھ رہنماؤں کے نام دیئے گئے۔
درخواستگزار کے مطابق پی ٹی آئی رہنماؤں کی کئی گھنٹوں تک انتظار کرانے کے باوجود ملاقات نہیں کرائی گئی۔ درخواست میں استدعا کی گئی ہے کہ عدالت توہین عدالت کی کارروائی کرے۔
