کراچی کے علاقے راشد منہاس روڈ پر رہائشی عمارت کے نیچے گیس سلنڈر کی دکان میں آتشزدگی سے دو افراد جھلس کر جاں بحق ہوگئے۔
کراچی کے علاقے راشد منہاس روڈ پر واقع رہائشی عمارت کے نیچے گیس سلنڈرکی دکان میں اچانک آگ بھڑک اٹھی، اطلاع ملنے پر فائر بریگیڈ کی چار گاڑیاں اور ریسکیو ٹیمیں موقع پر پہنچیں اور شعلوں پر قابو پانے کی کوشش کی۔ فائربریگیڈ حکام کے مطابق دکان میں آگ بجھانے کے آلات موجود نہیں تھے ۔ دکان کو دو دن پہلے ہی ڈی سیل کیا گیا تھا۔
علاقہ مکینوں اور اطراف کے دکانداروں کا کہنا تھا کہ رہائشی اپارٹمنٹ کے نیچے گیس سلینـڈر کی دکان سے متعلق کئی مرتبہ انتظامیہ کو شکایت کی لیکن کسی نے کوئی کارروائی نہیں کی۔ آتشزدگی کے نتیجے میں جاں بحق افراد کی شناخت اسد اور عمر کے نام سے ہوئی ۔
