محکمہ داخلہ پنجاب نے میانوالی ، فیصل آباد ، بہاولپور، جھنگ اور ٹوبہ ٹیک سنگھ میں دفعہ 144 کا نفاذ کر دیا جس کے تحت ہر قسم کے سیاسی اجتماعات ، دھرنے ، جلسے اور مظاہروں پر پابندی ہوگی۔
حکومت پنجاب نے میانوالی میں 7 دن کیلئے دفعہ 144 نافذ کی جبکہ پابندی کا اطلاق منگل یکم اکتوبر سے سوموار سات اکتوبر تک ہوگا اور ضلعی انتظامیہ کی سفارش پر میانوالی میں رینجرز کی تعیناتی کا فیصلہ بھی کیا گیا ہے۔
میانوالی میں رینجرز کی دو کمپنیاں یکم سے 3 اکتوبر تک تعینات ہوں گی۔
فیصل آباد، جھنگ،ٹوبہ ٹیک سنگھ اور بہاولپور میں بھی دفعہ 144 نافذ کی گئی ہے۔
محکمہ داخلہ پنجاب کے مطابق ہر قسم کے سیاسی اجتماعات، دھرنے، جلسے، مظاہرے، احتجاج اور ایسی تمام سرگرمیوں پر پابندی عائد ہو گئی جبکہ فیصلہ دہشت گردی کے خطرات کے پیش نظر کیا گیا ہے۔
فیصل آباد ،ٹوبہ ٹیک سنگھ ، بہاولپور اور جھنگ میں پابندی کا اطلاق بدھ 2 اکتوبر سے جمعرات 3 اکتوبر تک ہو گا۔
محکمہ داخلہ پنجاب کا کہنا ہے کہ سیکیورٹی خطرات کے پیش نظر کوئی بھی عوامی اجتماع دہشت گردوں کیلئے سافٹ ٹارگٹ ہو سکتا ہے۔
