سماء کی ٹیم لائنز نے چیمپئنز ون ڈے کپ کے پہلے ایلیمنیٹر میں الائیڈ بینک اسٹالیئنز کو 12 رنز سے شکست دیتے ہوئے کامیابی حاصل کرلی ہے ۔
تفصیلات کے مطابق اسٹالیئنز کی پوری ٹیم لائنز کی جانب سے دیئے گئے 264 رنز کے ہدف کے تعاقب میں 49.4 اوورز میں 9 وکٹوں کے نقصان پر 251 رنز بنا کر آوٹ ہو گئی اور یوں 12 رنز سے شکست کا سامنا کرنا پڑا ۔ اسٹالینئز کی جانب سے اوپنر یاسر خان 39 رنز کے ساتھ سرفہرست رہے جبکہ جہانداد خان 36 حسین طلعت 32 ، محمد محسن 30 ، محمد حارث 30 ، طیب طاہر 28 رنز بنانے میں کامیاب ہوئے ۔
لائنز کی جانب سے احمد دانیال نے بیٹنگ کے بعد باولنگ کے شعبے میں بھی کمال دکھایا اور 3 کھلاڑیوں کو پولین کی راہ دکھائی ان کے علاوہ خوشدل شاہ نے بھی 3 کھلاڑیوں کو آوٹ کیا، سراج الدین ، فیصل اکرم اور سراج نے ایک ایک وکٹ حاصل کی ۔
لائنز نے ٹاس جیت کر پہلے بیٹنگ کا فیصلہ کیا اور مقررہ 50 اوورز میں 9 وکٹوں کے نقصان پر 263 رنز بنائے جس میں سب سے اہم کرداراحمد دانیال کا رہا جنہوں نے5 چھکوں اور 2 چوکوں کی مدد سے 65 رنز کی ناقابل شکست اننگ کے ساتھ ٹیم قابل دفاع ہدف دینے میں مدد فراہم کی ۔
لائنز کی جانب سے کھیل کا آغاز روحیل نذیر اور کپتان امام الحق نے میدان میں اتر کر کیا لیکن اوپننگ پر آنے والے روحیل نذیر صرف 4 رنز بنا کر پولین لوٹ گئے جبکہ کپتان امام الحق بھی 23 رنز بنانے میں کامیاب ہوئے ، محمد طہٰ 47 رنز جبکہ سراج نے 38 رنز بنائے ۔ ان کے علاوہ امیر یامین نے اچھے کھیل کا مظاہر ہ کرتے ہوئے 46 رنز کی اننگ کھیلی ۔
