وزیرِاعلی پنجاب مریم نواز کی طرف سے بجلی کے بلوں میں 14 روپے فی یونٹ ریلیف کے معاملے پر مکمل طور پر عمل درآمد نہ ہو سکا۔
وزیراعلی پنجاب کی جانب سےبجلی کےبلوں میں چودہ روپےفی یونٹ ریلیف صرف سنگل فیزمیٹر صارفین تک محدود ہوکر رہ گیا،تھری فیزمیٹرصارفین وزیراعلی مریم نواز کے ریلیف سے محروم رہے۔
لاہورالیکٹرک سپلائی کمپنی (لیسکو) ذرائع کےمطابق ریلیف صرف سنگل فیز میٹر پر ملا جبکہ تھری فیز میٹر کے صارفین ریلیف سے محروم رہے۔ لیسکو ذرائع کا کہنا ہے کہ وزیرِاعلیٰ پنجاب نے سنگل اور تھری فیز تمام صارفین کے لیے ریلیف کا اعلان کیا تھا تاہم وزارت نے صرف سنگل فیز میٹر صارفین کو ریلیف دینے کی ہدایت کی۔
لیسکو ذرائع کےمطابق اس ماہ کےتھری فیزمیٹر کے بلوں پر14روپے فی یونٹ ریلیف شامل نہیں،صارفین کی بڑی تعدادریلیف کیلئے روزانہ دفاتر کےچکرلگاتی ہے۔
یاد رہے کہ اگست میں پنجاب حکومت نے بجلی 14روپے فی یونٹ سستی کر دی تھی، صوبائی حکومت نے 500 یونٹ تک بجلی استعمال کرنے والوں کیلئے اگست اور ستمبر کے بلز پر فوری ریلیف دینے کا فیصلہ کیا تھا۔
