بالی وڈ اسٹار ملائکہ اروڑا کی جانب سے والد ‘انیل مہتا‘ کی مبینہ خودکشی کے بعد سوشل میڈیا پر جاری کیا جانے والا پہلا پیغام وائرل ہوگیا ہے ۔
تفصیلات کے مطابق اداکارہ ملائکہ اروڑا آج صبح والد کے انتقال کے بعد پونے سے ممبئی پہنچی تھیں جہاں سوشل میڈیا پر وائرل ہونے والی ویڈیوز میں ملائکہ کو نم آنکھوں کے ساتھ گہرے رنج میں دیکھا جاسکتا ہے۔
بھارتی میڈیا پر جاری رپورٹس میں دعوٰی کیا جارہا ہے کہ ‘انیل مہتا کی جانب سے خودکشی سے قبل آخری فون کال اپنی دونوں بیٹیوں ملائکہ اور امرتا کو کی گئی تھی۔جس میں ان کا کہنا تھا کہ وہ ‘تھک گئے ہیں‘ جس کے بعد ملائکہ کے سوتیلے والد کی خودکشی کی خبر میڈیا پر نشر ہوئی۔
بالی وڈ کی آئٹم گرل ملائکہ اروڑا کی جانب سے والد کے انتقال کے بعد فوٹو اینڈ ویڈیو شیئرنگ ایپ انسٹاگرام پر اپنی پہلی پوسٹ جاری کی گئی جو دیکھتے ہی دیکھتے وائرل ہوگئی۔
View this post on Instagram
ملائکہ کی جانب سے انسٹاگرام پر جاری کی جانے والی پوسٹ میں مداحوں کو بتایا گیا کہ ’والد کی وفات کے بعد ہمارا خاندان گہرے صدمے میں ہے، ہمیں اپنے پیارے والد انیل مہتا کے انتقال کا اعلان کرتے ہوئے بہت دکھ ہورہا ہے کیونکہ وہ ایک نرم مزاج دادا، پیار کرنے والے شوہر اور ہمارے بہترین دوست تھے۔ ہمارا خاندان اس نقصان سے گہرے صدمے میں ہے اور ہم اس مشکل وقت میں میڈیا اور خیر خواہوں سے پرائیویسی کی درخواست کرتے ہیں‘۔
واضح رہے کہ علی الصبح بھارتی میڈیا پر یہ خبر نشر ہوئی کہ بالی وڈ سپر اسٹار ملائکہ اروڑا کے سوتیلے والد انیل مہتا نے ممبئی کے پوش علاقے باندرہ میں واقع اپنے اپارٹمنٹ سے چھلانگ لگا کر خودکشی کرلی۔
جس کے بعد بالی وڈ اسٹار ملائکہ اروڑا کی والدہ کی رہائش گاہ پر پُرسہ دینے کیلئے پہنچنے والوں میں بالی وڈ کی بڑی بڑی نامور شخصیات کے نام سرِفہرست ہیں جن میں ملائکہ کے سابق سسرالیوں سمیت سابق بوائے فرینڈ ‘ارجن کپور‘ بھی شامل ہیں۔
