بنگلہ دیش کے ہاتھوں ٹیسٹ سیریز میں تاریخی شکست کے بعد پاکستان ریڈ بال ٹیم کے کپتان شان مسعود کی کپتانی انڈر سکروٹنی آگئی ۔
ذرائع کے مطابق پاکستان کرکٹ کے مستقبل کا لائحہ عمل طے کرنے کے لئے اعلیٰ سطحی اجلاس اور ورکشاپ کا فیصلہ کر لیا گیا ہے۔
پاکستان کرکٹ بورڈ ( پی سی بی ) کی جانب سے اجلاس اور ورکشاپ کو کنیکشن کیمپ کا نام دیا گیا ہے جو کہ 22 ستمبر کو ہونے کا امکان ہے اور اس کی صدارت چیئرمین پی سی بی محسن نقوی کریں گے۔
ذرائع کے مطابق کنیکشن کیمپ میں ریڈ اور وائٹ بال کے ہیڈ کوچز جیسن گلیسپی اور گیری کرسٹن بھی شریک ہوں گے جبکہ انٹرنیشنل ، ڈومیسٹک اور ہائی پرفارمنس کے سربراہان بھی شرکت کریں گے۔
سنئیر کرکٹرز کوچز اور پی سی بی کے سنئیر آفیشلز بھی شریک ہوں گے۔
کنیکشن کیمپ میں سامنے آنے والی تجاویز کی روشنی میں مستقبل کے فیصلے ہوں گے۔
ذرائع نے بتایا کہ ریڈ اور وائٹ بال کوچز آپس میں بھی میٹنگز کریں گے اور کپتانوں کی تبدیلی کے حوالے سے بھی تبادلہ خیال ہو گا۔
وائٹ بال کوچ گیری کرسٹن جولائی میں ٹی 20 ورلڈ کپ کے حوالے سے اپنی رپورٹ پیش کرنے کے بعد وطن واپس چلے گئے تھے جبکہ ریڈ بال کوچ جیسن گلیسپی بنگلہ دیش کے خلاف سیریز کے بعد آسٹریلیا چلے گئے تھے۔
ذرائع کا مزید کہنا تھا کہ دورہ آسٹریلیا کے لیے پاکستانی وائٹ بال ٹیم کا نیا کپتان ممکن ہے اور ٹیسٹ کپتان شان مسعود کی کپتانی بھی انڈر سکروٹنی آگئی ہے۔
